Կառավարությունում, ինչպես հայտնի է, ստեղծվել է կոռուպցիայի դեմ պայքարող ինչ-որ կառույց, որը համակարգելու են վարչապետ Հովիկ Աբրահամյանն ու ֆինանսների նախարար Գագիկ Խաչատրյանը: Խորհրդարանական խմբակցություններին առաջարկվել է ներկայացուցիչներ գործուղել այդ մարմին:
«Բարգավաճ Հայաստան» խմբակցությունն այյդ կառույցում կներկայացնի պատգամավոր Միքայել Մելքումյանը: Արդյոք կարո՞ղ է վստահություն ներշնչել այնպիսի մի կառույց, որը ղեկավարում են վերը նշված պաշտոնյաները, ովքեր հայտնի են որպես խոշոր գործարարներ, և որոնց անունները երբեմն հիշատակվում են ինչ-որ կոռուպցիոն երևույթների դեպքերում՝ «Առաջին լրատվական»-ի հարցին Մ. Մելքումյանը պատասխանեց. «Նախ՝ պետք է ասեմ, որ մենք դա չենք անձնավորում: Մենք գտնում ենք, որ եթե կա այս կառույցի ստեղծման վերաբերյալ որոշում, ապա դա քաղաքական որոշում է: Սա սովորական, շարքային տնտեսական կամ վարչարարական որոշում չէ, սա քաղաքական որոշում է»:
Մեր հաջորդ հարցին ի պատասխան՝ այդ դեպքում, Ձեր կարծիքով, կոռուպցիոն երևույթներն ավելի շատ ո՞ր ոլորտներում են, և պատգամավորն ինքը կոռուպցիայի դեմ պայքարելու համար այդ մարմնին ի՞նչ առաջարկություններ կներկայացնի, ԲՀԿ պատգամավորն ասաց. «Ես չեմ ուզում հիմա ոլորտները առանձնացնել, բայց կոռուպցիոն երևույթներն այնտեղ են ընդգծված, որտեղ ֆինանսական հոսքեր կարող են առաջանալ: Դա նոր երևույթ չէ, մեր նորանկախ պետության 25 տարիների ընթացքում եղել է: Ճիշտ է, միգուցե ինչ-որ երանգներ մեղմացել կամ ակտիվացել են, բայց դա առաջանում է այնտեղ, որտեղ շահերի բախում կա, ֆինանսական հոսքեր կարող են լինել»:
