«Արևելյան գործընկերության շրջանակները պիտի հիմնվեն այն գործընկերների վրա, որոնք ունեն նույնպիսի տեսակետ, ինչպիսին մենք ունենք Ռուսաստանի նկատմամբ: Եվ դա այսօր թույլ կտա, որ մենք կարողանանք ստեղծել խաղաղություն և այն կայունացնել Եվրոպայում»,- «Առաջին լրատվական»-ի հետ զրույցում ասաց Լեհաստանի Սեյմի անդամ Միխալ Սևերինսկին՝ անդրադառնալով ԱլԳ-ում Հայաստանի դերի կամ նշանակության մասին հարցին:
Փաստորեն Հայաստանը չի՞ պատկանում լեհ պատգամավորի նշած երկրների թվին. չէ՞ որ Ռուսաստանի նկատմամբ չունի այն նույն վերաբերմունքը, ինչը ունի Արևելյան գործընկերության ծրագրի նախաձեռնողներից Լեհաստանը կամ եվրոպական այլ երկրներ: «Ես չեմ կարող ասել, թե որն է Հայաստան պետության և Հայաստանի կառավարության դիրքորոշումը, բայց ես կարծում եմ, որ Հայաստանը պետք է նշել այն երկրների թվում, որոնք ցանկանում են, որ Եվրոպայի արևելքում խաղաղություն լինի»,- պատասխանեց Մ. Սևերինսկին:
Վերջինս Հայաստանում էր Ֆրանկոֆոնիայի խորհրդարանական վեհաժողովի Եվրոպական տարածաշրջանի սեկցիաների նախագահների համաժողովին մասնակցելու համար: Նա այդ կառույցում Լեհաստանի ներկայացուցիչներից մեկն է:
Մ. Սևերինսկին մեզ հետ զրույցում անդրադարձավ նաև Հայաստանի պատմությանն ու Ցեղասպանության իրողությանը: «Ինձ վրա մեծ ազդեցություն է թողել Հայաստանի պատմությունը, հայ ժողովրդի պատմությունը: Հայ ժողովուրդը կարողացել է վերապրել շատ բաներ, կարողացել է կազմակերպվել, ստեղծել ու արարել: Կարծում եմ, որ հայ ժողովրդի համար ապագա ստեղծելը դժվար էր, բայց այդ ապագան այսօր կա»,- եզրափակեց Մ. Սևերինսկին: