Համաշխարհային բանկի գործադիր տնօրենների խորհուրդը երեկ հաստատել է հայաստանի «Էլեկտրահաղորդման ցանցի բարելավման ծրագրի» համար 52 միլիոն դոլար արժողությամբ վարկը: Կանխատեսվում է, որ այս նոր ծրագիրը կբարելավի Էլեկտրահաղորդման ցանցի էլեկտրամատակարարում ապահովելու կառավարության ջանքերը: Վարկային միջոցներով նախատեսվում է հիմնանորոգել Աշնակ ենթակայանը, որը շահագործման է հանձնվել 1983 թվականին և այն ժամանակվանից ի վեր չի նորոգվել:
Միջոցները կուղղվեն նաև Երևանի ջերմաէլեկտրակայանի (Երևան ՋԷԿ) ենթակայանի հիմնանորոգմանը, որին բաժին է ընկնում Հայաստանի էլեկտրաէներգիայի տարեկան արտադրության 20 տոկոսը:
Համաշխարհային բանկի հայաստանյան գրանսենյակի տնօրեն Լորա Բեյլն այսօր լրագրողների հետ հանդիպման ժամանակ անդրադառնալով այս վարկին՝ նշեց, որ դրա անհրաժեշտությունը կար, քանի որ ներկայումս Հայաստանի էներգետիկ ոլորտի առջև մի շարք մարտահրավերներ են ծառացել: Տիկին Բեյլին նշեց նաև, որ կանխատեսվում է, որ 2020 թվականին Հայաստանը կարող է լուրջ խնդիրների առաջ կանգնել էլեկտրաէներգիայի մասով: Լրագրողները վերջինից հետաքրքրվեցին՝ կարելի՞ է ասել, որ այդ կանխատեսումները բխում են այն բանից, որ հնարավոր է՝ 2020 թվականին դադարեցվի Մեծամորի ատոմակայանի գործունեությունը: «Ինչ վերաբերում է Մեծամորի ատոմակայանի կյանքի ցիկլին, ապա դա գործոններից մեկն է»,- ասաց Բեյլին: Նա խոսեց նաև գազով էլեկտրաէներգիա արտադրելու ծրագրի մասին՝ նշելով, որ Հայաստանի էներգետիկ համակարգին անհրաժեշտ կլինի շուրջ 500 ՄՎտ գազով էլեկտրաէներգիա արտադրելու կարողություն՝ մինչև 2020 թ.մատակարարման կարողության շեղքվածքի առաջացումը կանխելու համար:
Համաշխարհային բանկի ծրագրերի թիմի ղեկավար Արթուր Կոչնակյանն էլ նշեց, որ էլեկտրաէներգիայի արտադրման նոր ծրագրի նախապատրաստումը այս ծրագրի շրջանակում իրականացվելիք մյուս կարևոր միջոցառումն է, քանի որ կառավարությունը նախատեսում է կառուցել համակցված ցիկլով աշխատող գազային տուրբին: Սակայն սա բավական աշխատատար և ֆինանսապես ոչ մատչելի գործընթաց է:
Առավել մանրամասն՝ տեսանյութում:
Լուսանկարը` PAN Photo-ի
