«Առաջին լրատվական»-ի զրուցակիցն է Ստեփանակերտի նախկին քաղաքապետ, «Շարժում 88» կուսակցության նախագահ Էդուարդ Աղաբեկյանը:
– Պարոն Աղաբեկյան, ինչպե՞ս եք գնահատում Ձեր կուսակցության հաղթանակի հասնելու հնարավորությունները առաջիկա խորհրդարանական ընտրություններում: Ընդդիմադիր ուժերի միավորում փաստորեն չեղավ, ի՞նչ եք կարծում՝ այսպես ավելի մե՞ծ է հաղթանակի հասնելու հնարավորությունը:
– Առաջին անգամը չէ, որ ընտրություններին մասնակցում եմ և գուշակություններով չէի ցանկանա զբաղվել:
Ինչ վերաբերում է միավորվելուն, ապա ես էլ Ձեզ հարցնեմ՝ այդ ե՞րբ եք տեսել, որ հայությունը միասնական ընդդիմադիր ճակատով հանդես գա: Ի վերջո՝ քաղաքական դաշտում կա նաև հետընտրական համագործակցություն հասկացությունը: Համենայնդեպս, ոչ մի քաղաքական ուժ մեզ միավորվելու առաջարկությամբ չի դիմել: 2005-ին «Շարժում 88»-ին առաջարկություն եղել է նախընտրական դաշինքի մասին, որի հետագա գործունեությունը ցույց տվեց, որ նախընտրական դաշինքը չի արդարացվել, ճիշտ չի եղել: Համենայնդեպս, ես հիմա չեմ բացառում հետընտրական համագործակցությունը:
– Նշեցիք, որ առաջին անգամը չէ, որ ընտրություններին եք մասնակցում, ի՞նչ եք կարծում՝ հիմա Արցախում կա՞ն արդյոք ազատ, արդար ընտրություններ անցկացնելու նախադրյալներ: Սովորաբար հասարակությունը հենց կեղծված ընտրությունների պատճառով է հիասթափություն ապրում՝ ձայն է տալիս, որը տեղ չի հասնում:
– Արդար և ոչ արդարը մի փոքր սուբյեկտիվ հասկացողություն է: Այն, որ ցանկացած ժամանակ և ցանկացած դեպքում իշխանությունները վարչական ռեսուրս են կիրառում՝ դա փաստ է: Համենայնդեպս, ընտրական օրենսգրքի խախտումներ հիմա քիչ են նկատվում։ Մենք միշտ էլ ընտրությունների գնացել ենք զրոյից՝ մեր տեղը գտնելով: Հիմա այս ընտրությունների առանձնահատկությունն այն է, որ դրական ֆոն կա: Մնացածը ժամանակը ցույց կտա՝ մայիսի 4-ին արդյունքները պարզ կլինեն:
– Ինչպե՞ս եք վերաբերվում այն հանգամանքին, որ ըստ որոշ տեղեկությունների՝ ընդդիմադիր մեկ այլ ուժի՝ «Ազգային վերածնունդին» սատարելու պատրաստակամություն է հայտնել ԼՂ պաշտպանության նախկին նախարար Սամվել Բաբայանը:
– Այդ հարցը կարող եք տալ հենց այդ կուսակցությանը կամ Սամվել Բաբայանին: Ես իմ անձնական կարծիքն ասեմ Սամվել Բաբայանի մասին: Նա՝ որպես Արցախի հերոս, պետք է միշտ Արցախում լինի, նա մեր երկրին անուրանալի ծառայություններ է մատուցել: Իսկ թե ինչ քաղաքական գործունեություն է հիմա ծավալում՝ դա իր անձնական գործն է, իր անձնական խնդիրն է, իր անձնական որոշումը:
– Բավարար շեմը հաղթահարելու դեպքում Դուք խորհրդարանում ընդդիմադի՞ր եք հռչակվելու:
– Միանշանակ:
– Պարոն Աղաբեկյան, այս օրերին Արցախում ևս խոսակցություններ կան սահմանադրական բարեփոխումներ իրականացնելու մասին: Հետաքրքիր է՝ ո՞րն է Ձեր կուսակցության դիրքորոշումը սրա հետ կապված: Խորհրդարանական կառավարման համակարգն ինչքանո՞վ է հարմար Արցախին:
– Խոսել խորհրդարանական և նախագահական ինստիտուտների մասին, նույնն է թե՝ տղա՞ն է լավ երեխա, թե՞ աղջիկը: Ինձ համար դրական և բացասական կողմեր կան կառավարման երկու մոդելներում էլ: Նախագահական ինստիտուտի հստակ դերակատարումը կիսանախագահականում չկա՝ կարծես սուլթանի և խանի իշխանություն է, ամեն ոք ունի միայն իրավունքներ, իսկ պատասխանատվություն ոչ ոք չի կրում: Միաժամանակ աշխարհաքաղաքական ներկա պայմաններում՝ թշնամու հարձակում, պատերազմի վտանգ, պետք է ճշգրտել նախագահի և խորհրդարանի պատասխանատվության բաժինը: Այս հարցը շատ լուրջ պետք է քննարկել: Ոչ վաղ անցյալում մերը եղել է խորհրդարանական կառավարում և խորհրդարանականից հեղաշրջում եղավ դեպի միանձնյա կառավարում՝ հուրախություն մեզ ունեցանք տարածքների ազատագրում, գրանցեցինք հաղթանակ: Այս հարցը շատ լուրջ քննարկումների կարիք ունի: Իսկ հիմա միանշանակ անհրաժեշտ է հստակեցնել նախագահի ինստիտուտի դերը։