«Ես երջանիկ եմ, որ նորից իմ հայրենիքում եմ: Իմ սիրտն ամեն անգամ թրթռում է, երբ այստեղ եմ գալիս, այս անգամ` առանձնահատուկ: Սա շատ կարևոր պահ է»,- այս խոսքերով այսօր լրագրողներին ողջունեց ռուսաստանաբնակ հայ երգչուհի, «Միրայֆ» (MIRAIF) ջազ բենդի մենակատար Մարիամ Մերաբովան, ով Հայաստան է ժամանել համերգային երկու ծրագրով:
Ապրիլի 1-ին Արցախում՝ Ստեփանակերտի ԼՂՀ մշակույթի ու երիտասարդության պալատում, նախատեսվում է Մերաբովայի բարեգործական համերգը, իսկ ապրիլի 5-ին երգչուհին ելույթ կունենա Ալ. Սպենդիարյանի անվան օպերայի և բալետի ակադեմիական թատրոնում:
Երգչուհու խոսքով` ինքը անգամ չէր էլ կարող պատկերացնել, որ մի օր երգելու է այդ թատրոնի բեմում: «Սա ֆանտաստիկա է, սիրտս թրթռում է… Օպերային թատրոնը այնպիսի սրբատեղի է ինձ համար: Ես առաջին անգամ չեմ այդ բեմում, սակայն մենք առաջին անգամ հանդես կգանք «Միրայֆ»-ի հետ մենահամերգով: Դա կլինի մեր «միրայֆյան» մեծ տոնը, բայց, միևնույն է, ես շատ եմ հուզվում»,- խոստովանեց երգչուհին:
Ինչ վերաբերում է անակնկալներին, ապա Մերաբովան չցանկացավ բացել փակագծերը, միայն նշեց, որ անակնկալը ոճով նման է լինելու այն ամենին, ինչ իրենք անում են:
«Դա Արթուր Գրիգորյանի հեղինակային երգն է, իր գեղեցկությամբ հիանալի մի ստեղծագործություն, որը ես երբեք չեմ ներառել իմ խաղացանկում, քանի որ պատրաստ չէի: Իսկ հիմա մտածում եմ, որ պատրաստ եմ»,- ասաց երգչուհին:
Ի դեպ, Արցախում գտնվելու օրերին երգչուհին հանդես կգա վարպետության դասով: Նա իր փորձը կփոխանցի Սայաթ-Նովայի անվան երաժշտական քոլեջի ուսանողներին և «Արցախի ձայնը» նախագծի մասնակիցներին: