Թուրքիայի մշակույթի և զբոսաշրջության նախարարությունը մերժել է ամերիկացի հայտնի դերասանուհի Ջուլիանա Մուրին՝ որպես զբոսաշրջության դեմք: Այս մասին հայտնում է Hurriyet թերթը:
Աշխարհում Թուրքիան որպես զբոսաշրջային ուղղություն զարգացնելու թենդերը հաղթած Iconisus & I Mean գործակալությունը Մուրի մասնակցությամբ գովազդային ֆիլմ է նկարահանել, որում նա հիշում է մանկության տարիներին Թուրքիա իր ճամփորդությունները: Ֆիլմը չի բավարարել Թուրքիայի մշակույթի նախարարությանը, որը պահանջել է այն վերանկարահանել: Դերասանուհին հրաժարվել է, ինչը հանգեցրել է նրա մասնակցությամբ նախագծի չեղարկման:
Նախարարությունում թերթի աղբյուրը հայտնել է, որ գովազդային ֆիլմը չընդունելու պատճառը եղել է Մուրի «թույլ դերասանական վարպետությունը»: Ավելի վաղ դերասանուհուն որպես զբոսաշրջության դեմք ընտրելը Թուրքիայում քննադատել են մի շարք ակնառու գործիչներ, որոնք նրան «դեպրեսիվ կերպար» են անվանել:
Նախարարությունը հրաժարվել է պաշտոնական հայտարարություն տարածել այս թեմայով, քանի որ չի մեկնաբանում չավարտված նախագծերը: Iconisus & I Mean-ը 1,5 մլն դոլար տուգանք կստանա 4 մլն դոլարի նախագիծը չեղարկելու պատճառով:
Մուրն այս տարի դարձել է «Օսկարի» դափնեկիր «Դեռևս Էլիս» ֆիլմում լավագույն կանացի դերի համար: Նա նաև արժանացել է «Էմիի» (1988, 2012), «Ոսկե գլոբուսի» (2013, 2015) և BAFTA-ի (2015), աշխարհի 3 ամենահեղինակավոր կինոփառատոների՝ Կաննի, Բեռլինի և Վենետիկի (եռակի) դափնեկիր է, աստղ ունի Հոլիվուդի Փառքի ծառուղում:
