Ռուսաստանի Պետդումայի նախագահ Սերգեյ Նարիշկինը այսօր ժամը 17 30-ին կհանդիպի խորհրդարանի ղեկավարության, ինչպես նաև խորհրդարանական խմբակցությունների և հանձնաժողովների նախագահների հետ:
Վաղը առավոտյան Նարիշկինը կհանդիպի խորհրդարանի պատգամավորների հետ ավելի ընդլայնված կազմով:
Նախատեսվում է, որ Նարիշկինը խորհրդարանի դահլիճում հանդես կգա ելույթով և ըստ ամենայնի կխոսի հայ և ռուս ժողովուրդների դարավոր բարեկամության, երկու երկրների միջև առկա ռազմավարական համագործակցության և դրա զարգացման հնարավորությունների մասին:
Խորհրդարանի պատգամավորներին հետաքրքրում է այլ հարց. արդյոք պատգամավորները ՌԴ Պետդումայի նախագահին հարց տալու հնարավորություն կունենա՞ն: Իսկ նրանց հետաքրքրում է այն հարցը, թե՝ ինչպե՞ս են Ռուսաստանի բիզնես-հարաբերությունները Ադրբեջանի հետ, արդյոք նավթի գների անկումը չի՞ ազդել այդ երկրին վաճառվող զենքի ծավալների վրա, և դեռ որքա՞ն հայ զինվոր պետք է զոհվի դաշնակից Ռուսաստանի կողմից Ադրբեջանին վաճառված զենքից:
