Apple-ի ղեկավար Թիմ Կուկը քննադատել է վերջերս ամերիկյան որոշ նահանգներում ընդունվող «խտրական» օրենքները: Տեղի ունեցողի նկատմամբ իր վերաբերմունքը Կուկը արտահայտել է The Washington Post թերթում հրապարակված հոդվածում:
«Ամբողջ երկրի նահանգներում ինչ-որ շատ վտանգավոր բան է տեղի ունենում»,- գրում է Կուկը: Որոշ օրինագծերում ասվում է, որ մարդիկ կարող են հաճախորդին ծառայությունների մատուցումից հրաժարվել կամ ոչ խտրականության մասին նահանգի օրենքին հակադրվել՝ վկայակոչելով իրենց կրոնական համոզմունքները՝ գրում է Կուկը:
Բացի դրանից, Apple-ի ղեկավարի խոսքով՝ Տեխասում քննարկում են օրենսդրական նախաձեռնությունը, ըստ որի՝ միասեռ ամուսնությունների թույլտվություն տրամադրած աշխատակիցները կարող են զրկվել աշխատավարձերից և թոշակներից, նույնիսկ եթե Գերագույն դատարանն այս տարի ավելի ուշ չեղարկի այդպիսի ամուսնությունների տեխասյան արգելքը:
Կուկը նշում է, որ նման օրենքները դեմ են այն սկզբունքներին, որոնց վրա հիմնվել է ԱՄՆ-ը, և կարող են քանդել ավելի մեծ հավասարության հասնելու ուղղությամբ տասնյակ տարիների աշխատանքը:
Ամերիկյան բիզնես-հասարակությունը վաղուց խոստովանել է, որ խտրականությունն իր բոլոր ձևերով բացասաբար է ազդում է բիզնեսի վրա՝ գրում է Կուկը: Ուստի Կուկն Apple-ի անունից հանդես է գալիս այդ նոր օրենսդրական ալիքի դեմ՝ ասվում է հոդվածում: Հոդվածագիրը հույս է հայտնում, որ շարժմանը ավելի շատ մարդ կմիանա: Հյուսիսային Կարոլինայից մինչև Նևադա քննարկման դրված այդ օրինագծերն իսկապես կհարվածեն աշխատատեղերին և տնտեսական աճին՝ նշում է Կուկը:
Apple-ի ղեկավարը հավելում է, որ խորը հարգանքով է վերաբերվում կրոնական ազատությանը, սակայն միևնույն ժամանակ կարծում է, որ կրոնը չի կարելի որպես խտրականության պատճառ օգտագործել:
