«Առաջին լրատվական»-ի զրուցակիցն է Գյումրիի նախկին քաղաքապետ Վարդան Ղուկասյանը:
– Պարոն Ղուկասյան, շաբաթ օրը Գյումրիում օրը ցերեկով դանակահարել են «Հիմնադիր խորհրդարանի» անդամներից մեկին: Կարծիք կա, որ դա պատվիրված է եղել: Ինչպե՞ս եք գնահատում այդ արարքը, և ի՞նչն է պատճառը, որ կրիմինալը չի լքում Գյումրին:
– Կրիմինալն ո՞վ է, ի՞նչ կրիմինալ: Ես Գյումրիում կրիմինալ չեմ տեսնում: Իսկ ինչ վերաբերում է կատարվածին, հարցրեք պատկան մարմիններից: Ես իրավասու չեմ այդ հարցում:
– Իսկ երբ մարդիկ օրը ցերեկով իրար վրա են կրակում, օրը ցերեկով քաղաքի կենտրոնում ակցիայի ժամանակ մարդ են դանակահարում, զենքով հաշիվներ են պարզում: Այս ամենը դուք ինչպե՞ս եք բնութագրում:
– Նմանատիպ արարքները ընդհանրապես բացասական երևույթներ են, և ոչ ոք դա չի խրախուսում: Բայց դե, գիտեք ինչ կա. կրիմինալը միշտ էլ եղել է ու կլինի: Դա եղել է Ադամից ու Եվայից սկսած ու այդպես էլ կշարունակվի ու չի կարա չլինի: Բայց դա խրախուսել ոչ ոք չի ցանկանում: Բոլորս էլ դեմ ենք դրան:
– Որ դեմ եք, ինչո՞ւ չեք պայքարում դրա դեմ: Հաճախ հենց Ձեր անունն է շրջանառվում նման կրիմինալ դեպքերում:
– Ես կրկնում եմ, պետք չի կենտրոնանալ Գյումրիի վրա: Նման դեպքեր լինում են և՛ Արարատյան դաշտում, և՛ Գյումրիում, և՛ Երևանում: Ինչ վերաբերում է պայքարին, ապա ով որ օրենքը խախտում է, պատասխան է տալիս օրենքի առաջ:
– Պարոն Ղուկասյան, մի քանի օր առաջ կառավարության որոշումով Գյումրիի ռուսական եղեղեցու հարակից տարածքը տրամադրվեց Ռուսական կողմին: Որպես նախկին քաղաքապետ՝ ինչպե՞ս եք գնահատում հայկական հողը հենց այնպես ռուսներին նվիրելու այս քայլը:
– Այդտեղ ռուսական եկեղեցի է, և ռուսները այդտեղ ծրագիր ունեն, որը իմ օրոք է եղել: Այնտեղ պետք է ռուսական հոգևոր կենտրոն լինի: Եկեղեցու կտուրը, պատուհանները իմ կողմից են վերանորոգվել: Ես կողմնակից եմ այդ քայլին: Դե, հիմա այդտեղ ռուսական եկեղեցի է, հայերն ի՞նչ պետք է անեն այնտեղ որ:
– Եկեղեցին վերակառուցելու կամ հոգևոր կենտրոն կառուցելու համար պարտադի՞ր էր հողատարածքն էլ նրանց տալ:
– Որ չտային, մենք այդ տարածքը ի՞նչ պետք է անեինք որ, մեր ինչի՞ն է պետք: Մանավանդ որ այդ տարածքը ծայրամասում է գտնվում: Դա այդքան կարևոր հողատարածք էլ չի: Իսկ եթե նրանք ներդրում են անում, թող անեն, ի՞նչ վատ է: Ինչքան ներդրում անեն, ծրագրեր բերեն, այնքան պարտավորվածություն կլինի խնամել տարածքը: Յուրաքանչյուր երկիր էլ թող գա, այդպես ներդրումներ անի, ու ես կողմնակից եմ դրան:
– Ու մենք այդպես մեր հողերը սկսենք զիջե՞լ ներդրում անողներին:
– Մենք հիմա մեր քաղաքում էնքան նմանատիպ տարածքներ ունենք, որ ոչ մի բան չենք անում, և ոչ մի բանի պիտանի չեն, իսկ եթե երկրներ կան, որ ուզում են գալ և ներդրում անել, վերակառուցել, թող գան, անեն, ի՞նչ է պատահել որ: Բա երկիրը, քաղաքը ո՞նց են կառուցում, այդպես են կառուցում: Թե չէ, հո էդ տարածքները չեն առնի-տանի էստեղից, մնալու է էլի մերը:
– Բայց որքանո՞վ եք ճիշտ համարում հատկապես Ավետիսյանների ընտանիքի սպանդից հետո, երբ գյումրեցիների վերաբերմունքն էականորեն փոխվել է ռուսների նկատմամբ, մոտ 6 հա տարածք ռուսներին տալը:
-Ես կարող եմ մի բան ասել, որ ռուսների նկատմամբ վերաբերմունք փոխելը սխալ է: Նմանատիպ չար զավակներին խստագույնս պետք է պատժել, դա փաստ է, բայց նրանով բնութագրել և վերաբերմունք ստեղծել ռուս ազգի նկատմամբ՝ ես սխալ եմ համարում: Մեկին 150 միլիոնի հետ համեմատել չի կարելի: Այսօր մեր սահմանը ռուսն է պահում, և մենք մեր շահերը չանտեսելով, գերի չդառնալով՝ պետք է ճիշտ քայլեր անենք: