Արդեն մեկ շաբաթ է՝ սիրիահայ գործարարները՝ 100-ից ավելի ստորագրություններով, դիմել են վարչապետ Հովիկ Աբրահամյանին՝ ՓՄՁ ԶԱԿ-ի աջակցությամբ վերցված վարկերի մայր գումարի մարման ժամկետը երկարաձգելու խնդրանքով, որպեսզի մի քանի այլ սիրիահայ գործարարների նման չհայտնվեն «սև ցուցակներում» և դատական քաշքշուկների մեջ:
«Առաջին լրատվական»-ի հետ զրույցում սիրիահայ գործարար Միքայել Կարապետը շեշտեց, որ վարչապետը իրենց դիմումին դեռ չի արձագանքել. «Ասում են՝ սահմանված է պատասխանել 30 օրում, բայց ժամանակ չկա սպասելու, վարկերի հետ կապված խնդիրները շատ են։ Ես իմ սեփական ոսկերչության ցեխն ունեմ, բայց վերջին շրջանում դրամի արժեզրկման և դոլարի թանկացման պատճառով մեր ընդհանուր գործերը խիստ վատացել են, վարկերին զուգընթաց՝ տան վարձեր և այլ ծախսեր»,- ասաց գործարարը:
Միքայել Կարապետը արդեն 3 տարուց ավելի է՝ Հայաստանում է, 1,5 տարի է, ինչ իր ոսկերչական արտադրամասն ունի, բայց եկամուտ չի կարողանում ապահովել։ Նրա խոսքով՝ սիրիահայ մի շարք գործարարներ արդեն լքել են Հայաստանը, շատ գործարարներ էլ փակել են իրենց արտադրամասը և այլ վայրերում բանվոր են աշխատում՝ վարկերը մարելու և հացի խնդիր լուծելու համար:
Գործարարը նաև նշեց, որ Հայաստանում իրենք գործարարության մեջ սկսնակ են, ուստի իրենց պետությունը խոստացել էր ապրանքների սպառման շուկաներ գտնել, սակայն ոչինչ էլ չի արվել:
Միքայել Կարապետը նաև տեղեկացրեց, որ խնդիրը ներկայացնելու համար հանդիպել են ՓՄՁ ԶԱԿ-ի տնօրենին և «ՎՏԲ Հայաստան» բանկի ներկայացուցիչների հետ:
Մանրամասները՝ տեսանյութում։