Մեծ Բրիտանիայում անցկացված սոցիոլոգիական հարցումը ցույց է տալիս, որ ընդդիմադիր Լեյբորիստական կուսակցությունն իշխող պահպանողականներին գերազանցում է 4 տոկոսով՝ քաղաքական առաջնորդների առաջին հեռուստադեբատներից հետո։ Այս մասին հայտնում է The Sunday Times-ը։
Հարցման արդյունքները հրապարակվել են նախընտրական քարոզարշավի մեկնարկի մասին հայտարարության նախաշեմին։ Այսօր կհանդիպեն վարչապետ Դևիդ Քեմերոնն ու թագուհի Էլիզաբեթ II-ը, որի ժամանակ էլ կհայտարարվի ընտրարշավի մեկնարկի մասին։
Հարցման արդյունքները վկայում են, որ Էդ Միլիբենդի գլխավորած լեյբորիստների օգտին պատրաստ է քվեարկել ընտրողների 36 տոկոսը, պահպանողականների օգտին՝ 32 տոկոսը, լիբերալ-դեմոկրատներին պատրաստ է աջակցել 8 տոկոսը։ ԵՄ-ին դեմ հանդես եկող Անկախության կուսակցությունը հավաքել է հարցվածների ձայների 13 տոկոսը, իսկ ընտրողների 6 տոկոսը նախապատվությունը տվել է «կանաչներին»։