Բելգիայի մայրաքաղաքում մոտ 20 հազար մարդ դուրս է եկել բողոքի զանգվածային ակցիայի՝ ընդդեմ ԵՄ-ում տնտեսման կոշտ միջոցառումների։ Այս մասին հայտնում է Interfax-ը։
Կազմակերպիչներից մեկի՝ Վուտեր Հիլերտի խոսքով՝ իրենց հասարակությունը դիմակայում է բազմաթիվ մարտահրավերների՝ տնտեսական, բնապահպանական, աղքատության ու անհավասարության։ «Եթե մենք ցանկանում ենք դրանց պատասխան գտնել, պետք է փոխենք ներկա քաղաքականությունը։ Մեր պահանջներն են՝ արդար հարկեր, հավասար հնարավորություններ բոլորի համար, ներդրումներ այնպիսի հիմնարար իրավունքներում, ինչպիսիք են կրթությունը, մշակույթն ու բնապահպանությունը»։
Ցուցարարները Բրյուսելի փողոցներ են դուրս եկել կարգախոսներով, որոնցով պահանջում են հարկային արդարություն, երիտասարդ սերնդի համար հեռանկարներ և տարեցների համար սոցիալական պաշտպանվածություն։
Ցուցարարները պահանջել են նաև արժանավայել աշխատանք, պայմաններ մշակութային զարգացման համար, շրջակա միջավարի պաշտպանություն, ժողովրդավարական սկզբունքների ամրապնդում։
Որոշ ցուցարարներ հեղափոխական երգեր են երգել։
