Իրանը և «վեցյակը» (ԱՄՆ, Մեծ Բրիտանիա, Ռուսաստան, Ֆրանսիա, Չինաստան և Գերմանիա) Շվեյցարիայում բանակցությունների ընթացքում, որոնք մեկնարկել են մարտի 26-ին և շարունակվում են կիրակի, քննարկում են հավանական փոխզիջումային լուծում` Իրանի միջուկային ծրագրի հարցով, սակայն պայմանավորվածություն դեռևս ձեռք չի բերվել: Այս մասին հաղորդում է Reuters գործակալությունը` վկայակոչելով իր աղբյուրներին:
Գործակալության տվյալներով` Թեհրանը պատրաստակամություն է հայտնել օգտագործել ուրանի հարստացման 6000-ից պակաս ցենտրիֆուգա և հարստացված ուրանի մեծ մասն ուղարկել Ռուսաստան: Իրենց հերթին, Արևմտյան երկրները քննարկել են իրանական կողմին սահմանափակ աշխատանքներ թույլատրելու հնարավորությունը, որոնք կապված կլինեն բժշկական նպատակների համար ուրանի զարգացման հետ:
ԱՄՆ պատվիրակության ներկայացուցիչն իր հերթին չի բացառել, որ բանակցությունները կարող են շարունակվել մինչև մարտի 31-ը: Այս մասին տեղեկատվություն է հրապարակել Bloomberg գործակալությունը: