Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ պետք է սկսվեր Արման Բաղդասարյանի գործի դատական քննությունը:
Ըստ մեղադրանքի՝ 37-ամյա Արման Բաղդասարյանը 2014 թվականի օգոստոսի 9-ին, գտնվելով Երևանի Պարոնյան 1 հասցեում գործող «Լաս» գիշերային ակումբում, շուրջ 1 ժամ տևողությամբ ակումբի աշխատողների ու մեկ հաճախորդի ներկայությամբ խուլիգանություն է կատարել, հայհոյել, գոռգոռացել ու աղմկել է, բռնություն է գործադրել ակումբի պարուհու նկատմամբ, խաթարել է ակումբի բնականոն աշխատանքը:
Արման Բաղդասարյանը մեղադրվում է խուլիգանության համար՝ ՀՀ քրեական օրենսգրքի 258 հոդվածի 2-րդ մասով:
Նրա խափանման միջոցը ստորագրությունն էր չհեռանալու մասին:
Դատական նիստին ներկայացել էին մեղադրող դատախազը, տուժող պարուհին, մինչև անգամ՝ մեկ վկա տղամարդ, բայց չէր ներկայացել ամբաստանյալ Արման Բաղդասարյանը:
Նախորդ դատական նիստին ևս ազատության մեջ գտնվող ամբաստանյալը չէր ներկայացել:
Դատարանը ամբաստանյալին բերման ենթարկելու որոշում էր կայացրել և ի կատարումն՝ ուղարկել երկու հասցեով՝ որտեղ Բաղդասարյանը հաշվառված է և որտեղ բնակվում է փաստացի:
Սակայն ոստիկանները կամակոր ամբաստանյալին բերման ենթարկել չէին կարողացել, որովհետև նրան երկու հասցեում էլ չէին հայտնաբերել:
Պարզվում է՝ Արման Բաղդասարյանը նախաքննության ժամանակ էլ է խուսափել քննությունից: Նրա նկատմամբ հետախուզում է հայտարարվել, նրան հայտնաբերել են: Նախաքննությունը շարունակվել է:
Բայց նախաքննական մարմինը որոշել է կալանքի տակ չառնել ոչ մեծ ծանրության հանցանքի համար մեղադրվող Բաղդասարյանին՝ հույս ունենալով, որ մեկ անգամ հայտարարված հետախուզումը դաս կլինի նրա համար:
Սակայն ստացվում է, որ Բաղդասարյանը հետևություններ չի արել ու նորից խուսափում է գործի քննությանը ներկայանալուց: Հիմա արդեն՝ դատարան չի գալիս:
Մեղադրողը միջնորդեց, որ դատարանը փոխի Արման Բաղդասարյանի խափանման միջոցը՝ չհեռանալու մասին ստորագրությունը, խափանման միջոց ընտրի կալանավորումը, հայտարարի հետախուզում: Եվ կասեցնի գործի վարույթը՝ մինչև ամբաստանյալը կհայտնաբերվի, կալանքի տակ կառնվի, ու հնարավոր կլինի նրան ներկայացնել դատարան:
Նախագահող դատավորը հեռացավ խորհրդակցական սենյակ:
Ապա հրապարակեց որոշումները, որոնցով մեղադրողի միջնորդությունը բավարարվեց:
Արման Բաղդասարյանի խափանման միջոցը փոխվեց, ընտրվեց կալանավորումը, նրա նկատմամբ հայտարարվեց հետախուզում, և գործի վարույթը կասեցվեց՝ մինչև ամբաստանյալի հայտնաբերումը: