«Առաջին լրատվական»-ի զրուցակիցն է ԱԺ պետական-իրավական հարցերի մշտական հանձնաժողովի նախագահ Հովհաննես Սահակյանը:
-Մամուլում տեղեկություններ կան, որ ապրիլի 24-ին ընդառաջ հնարավոր է` մեծ համաներում տեղի ունենա։ Պետաիրավական հանձնաժողովն այս մասին տեղեկատվություն ունի՞։
-Հասկանում եմ հանրության մեջ եղած տրամադրությունը, որովհետև ազգային տոներին ու տարելիցներին ընդառաջ մշտապես լինում է համաներում։ Որպես պետաիրավական հարցերի հանձնաժողովի նախագահ` պետք է ասեմ, որ առ այսօր որևէ պաշտոնական փաստաթուղթ կամ տեղեկատվություն չկա մեզ մոտ։ Բնականաբար, չկա որևէ խումբ կամ ենթախումբ, որը կքննարկի նման հարցեր։ Համաներումը, որպես մարդասիրության դրսևորում, գտնվում է բացառապես երկրի նախագահի իրավասությունների շրջանակում, և եթե նպատակահարմար գտնի և նմանատիպ քայլի գնա, ապա, բնականաբար, մենք, ԱԺ կանոնակարգ- օրենքով սահմանված կարգով, նախ մեր հանձնաժողովում, ապա նաև ԱԺ նիստում կքննարկենք այդ խնդիրը։
-Վերջին անգամ 2013-ին է եղել համաներում։ Ձեր կարծիքով` որքա՞ն ժամանակը մեկ պետք է տեղի ունենան համաներումներ։
-Որևէ հստակ կանոնակարգ այդ մասով չկա, որ ենթադրենք 5 տարին մեկ, 10 տարին մեկ կամ յուրաքանչյուր տարի պետք է համաներում լինի։
-Համաներումների ժամանակ ամենաշատը քննադատության է արժանացել այն դրույթը, ըստ որի` համաներումը չի տարածվում այն դատապարտյալների վրա, որոնք չեն փոխհատուցել պատճառված վնասը։ Արդյոք այս մասով ԱԺ պետաիրավական հանձնաժողովն անելիքներ չունի՞։
-Դա ավելի գլոբալ խնդիր է, որը սահմանվում է քրեական և քրեադատավարական օրենսգրքերով։ Մենք, գիտեք, աշխատում ենք քրեադատավարական օրենսգրքի նախագծի վրա, որն ընդունվել է մեծ օրակարգ։ Ձևավորվել էր աշխատանքային խումբ, որն իր տեսակետը հայտնել է կառավարությանը, և սպասում ենք նրանց պատասխանին։ Հետևաբար, այդ խնդիրները կարելի է դիտարկել օրենսդրական բարեփոխումների շրջանակներում, բայց դա դիտարկել որպես համաներման առանցք, որ պետք է բացառի համաներման կիրառումը նյութական պատասխանատվություն ունենալու դեպքում, սա խորհելու և մտածելու խնդիր է։
-Վերջին օրերին սահմանին դարձյալ լարվածություն է նկատվում։ Որքանո՞վ եք կապ տեսնում Սերժ Սարգսյանի` ՌԴ-ի կողմից Ադրբեջանին զենք վաճառելու վերաբերյալ մտահոգության և սահմանային լարվածության միջև։ Ի դեպ, երկար ժամանակ ՀՀԿ-ական պատգամավորները արդարացնում էին Ռուսաստանի այդ քայլը` նշելով, թե դա բիզնես է։ Հիմա ինչ-որ բա՞ն է փոխվել մեր արտաքին քաղաքական կուրսում։
-Ես չեմ կարծում, որ արտաքին քաղաքականությունը փոխելու տեսանկյունից պետք է դիտարկել դա։ Ընդամենը մենք տեսնում ենք, որ այսօր ավելի շատ է թեժացել սահմանին իրավիճակը։ Մենք տեսանք, որ օգոստոսյան լարվածությունից հետո իրավիճակը որոշակիորեն կայունացավ, լայնամասշտաբ գործողությունների ու դիվերսիաների թիվը պակասել էր։ Հիմա տեսնում ենք` որքան Ադրբեջանն ավելի շատ է զինվում, ավելի է մեծանում նրա ռազմական բյուջեն, փորձում է իրեն ավելի վստահ զգալ, այնքան ավելի շատ է կտրուկ գործողությունների դիմում։ Սերժ Սարգսյանի հայտարարության և սահմանին լարվածության հետ կապված` մենք մեկ այլ գործոն ևս պետք է հաշվի առնենք, որ մենք ընդառաջ ենք գնում Հայոց ցեղասպանության 100-րդ տարելիցին, և բնականաբար, իր ավագ եղբոր՝ Թուրքիայի երեսը պարզ անելու համար Ադրբեջանը պետք է լարվածություն ստեղծի, որպեսզի շեղի ամբողջ հասարակության, միջազգային հանրության ուշադրությունը։
