«Առաջին լրատվական»-ի զրուցակիցն է ՀԱԿ խմբակցության քարտուղար Արամ Մանուկյանը:
– Պարոն Մանուկյան, ինչո՞վ են պայմանավորված Հայաստանի մասին Եվրամիության վերջին՝ ՄԱԿ–ի և միջազգային այլ կառույցների բացասական զեկույցները:
– Միջազգային բոլոր կառույցներն արդեն հոգնում են Հայաստանի իշխանություններից, և դա հիմք ունի: Նրանց տված բոլոր գումարներն անարդյունք են գնում, ոչ մի ծրագիր արդյունքի չի հասնում: Ողջ վստահությունը, հանդուրժողականությունը, համբերատարությունն ի վերջո իրենց նպատակին չեն հասնում: Մարդիկ հոգնում են, որովհետև Հայաստանի իշխանությունը բազմիցս ապացուցում է, որ իր վրա դրված ջանքերն իզուր են անցնում: Մեկ թռնում է Եվրոպա, մեկ թռնում է Ռուսաստան, հետո քաշվում է մեկի կողմը, հետո մյուսի հույսերը չի արդարացնում: Այսինքն՝ Հայաստանը դարձել է անլուրջ գործընկեր, Հայաստանի նկատմամբ այլևս վստահություն չկա, որևէ միջազգային լուրջ կառույցի կողմից այլևս չեն էլ հրավիրվում: Դա է պատճառը, որ նրանք ուղղակի հոգնում և հիասթափվում են մեր իշխանություններից:
– Աստանայում տեղի ունեցած Եվրասիական տնտեսական միության անդամ երկրների ղեկավարների վերջին հանդիպո՞ւմը նկատի ունեք, որին Հայաստանը չէր մասնակցում:
– Աստանայի հանդիպումը տարօրինակ ու աննախադեպ էր: Մի կառույցի անդամ ես, և ընդամենը չորս երկիր կա այդ կառույցում, որոնցից երեքը մասնակցում են հանդիպմանը, քննարկում լրջագույն խնդիրներ և քեզ չեն հրավիրում: Օրինակ՝ ամենալուրջ խնդիրը, որ այնտեղ քննարկվում էր, միասնական տարադրամ ունենալու հարցն էր, որին պետք է կողմ կամ դեմ լինես, որի հետ կապված կարծիք կամ առաջարկներ ունենաս: Ո՞վ է այնտեղ այդ խնդիրների շուրջ Հայաստանի շահը ներկայացրել: Հետո այնտեղ այդ երկրների փոխվարչապետներն են հանդիպել և լուրջ տնտեսական խնդիրներ լուծել: Հայաստանը չկա դրա մեջ: Այդ խնդիրները պարզ կդառնան մայիսին, այնտեղ որոշումներ կկայացվեն մեր նկատմամբ: Եթե դու այդ կառույցի անդամ ես, չես իմանա՝ ինչ դիրքորոշում ունենաս, քանի որ արդեն եղել է որոշումը: Մենք սուբյեկտ չենք, մենք որոշում կայացնող չենք: Մենք մի օբյեկտ ենք, որի նկատմամբ որոշում են կայացնում: Սա սուվերենության աննախադեպ կորուստ է:
– Բայց փոխարենը Հայաստանը կարծես թե ակտիվացրել է Եվրոպայի հետ եվրաինտեգրման գործընթացները:
– Ցանկացած ակտիվացում լավ է, եթե դու ընդհանուր դաշտի մեջ ես: Մենք այդ ակտիվացման դառը պտուղները տեսանք սեպտեմբերի 3-ին: Չորս տարի փող ծախսվեց, նպատակ դրվեց, օրենք գրվեց, ամբողջ Հայաստանն աշխատեց եվրոպական ասոցացման պայմանագրի վրա, բայց մեկ օրվա մեջ Սերժ Սարգսյանին այնպիսի քաղաքական ապտակ տվեցին, որ ուրիշ դաշտում հայտնվեց: Հիմա եթե սա այդ պրոցեսի շարունակությունն է, ուրեմն էլի Հայաստանին ապտակներ է բերելու: Դու այն երկիրը չես, որ քո ռազմավարական ընկերների հետ համաձայնեցված քաղաքականություն չիրականացնես: Ե՛վ եվրոպացիների, և՛ Ռուսաստանի հետ հարկավոր է բաց տեքստով խաղալ, բաց, համաձայնեցված քաղաքականություն իրականացնել, հակառակ դեպքում Հայաստանը կարող է երկու կողմից էլ ճզմվել: Եթե երկրի ղեկավարը բաց, համաձայնեցված քաղաքականություն է տանում, շահում է դրանից:
– Հայաստանի մասին ԵՄ վերջին զեկույցում տեսակետ կար, որ սահմանադրական բարեփոխումների հետ կապված լայն կոնսոլիդացիա չկա: Մինչդեռ մենք տեսանք, որ օրեր առաջ Ս. Սարգսյանը բավականին մեծ թվով ուժերի հետ հանդիպեց: Իսկ սահմանադրական փոփոխությունների մասնագիտական հանձնաժողովը հիմա այդ ուժերի կողմից առաջարկությունների է սպասում:
– Ձեր ասած մեծ թիվը բացարձակ որակ չի կազմում: Երկու-երեք հոգուց բաղկացած կուսակցություններ են գնացել Ս. Սարգսյանի հետ հանդիպման: Դա բացարձակ կոնսոլիդացիա չէ:
– Բայց այդ հանդիպմանը գնացել էին նաև «Բարգավաճ Հայաստան» կուսակցության ներկայացուցիչները:
– ԲՀԿ-ն հայտարարել է, որ դեմ է սահմանադրական փոփոխություններին: ԲՀԿ-ն, «Ժառանգությունը» և ՀԱԿ-ն այսօր Հայաստանի ընդդիմադիր, ոչ իշխանական դաշտում ամենահզոր ուժերն են: Այդ երեք ուժերն էլ արտահայտել են իրենց տեսակետը: Ձեր ասած կոնսոլիդացիան կտեղափոխվի մի փոքր ավտոբուսի մեջ, որոնք աջակցում են Ս. Սարգսյանին:
– Բայց ԲՀԿ–ն վերջին դեպքերից հետո կարծես թե նույն ընդդիմությունը չէ և դժվար թե հիմա հակաքարոզչություն իրականացնի:
– Մենք հիմա խոսում ենք սահմանադրական փոփոխությունների մասին, որոնց նկատմամբ ԲՀԿ-ի տեսակետն ընդդեմ տեսակետ է:
– Բայց մի բան է պարզապես դեմ լինել, մեկ այլ բան՝ նախկինի նման հակաքարոզչություն իրականացնել և այդ գործընթացների դեմ պայքարել:
– Մարդիկ հիմա փոքր թայմաութի մեջ են: Սպասեք մի փոքր՝ կազմավորվեն, շունչ քաշեն ու իրենց ասելիքն ասեն:
– ԵՄ–ի զեկույցում առաջարկություն կար, որ մինչև 2017 թ. խորհրդարանական ընտրությունները, Հայաստանը պետք է փոփոխություններ կատարի Ընտրական օրենսգրքում: Հանրապետական կուսակցությունից հայտարարում են, որ իրենք նախապատրաստվում են այդ փոփոխություններին ու դրանց հետ կապված քննարկումներ են անում տարբեր քաղաքական ուժերի հետ: ՀԱԿ-ի հետ կա՞ն նման քննարկումներ:
– Ես ընդհանրապես չեմ քննարկում որևէ հարց, որը կապված է 2017-2018 թթ. հետ, որովհետև ունեմ մինչև 2017 թ. ինչ-որ բան անելու ծրագիր:
– Այնուամենայնիվ, Ձեր կարծիքով՝ կա՞ Ընտրական օրենսգիրքը փոփոխության ենթարկելու անհրաժեշտություն:
– Ցանկալի կլինի լավ օրենքով ընտրություն անել, բայց հին օրենքն էլ բավարար է, որ ժողովրդին ստիպի գնալ արտահերթ ընտրությունների: Դա արդեն նոր հոգեբանություն է: Եթե կլինի լավ օրենք, բնականաբար, հեշտ կլինի այդ խնդիրն իրականացնել: Բայց խնդիրը կամքի մեջ է: Ցանկացած իդեալական օրենքով Ս. Սարգսյանն այնպես կկեղծի, որ քեֆդ կգա: Մեր նպատակն է փորձել արտահերթ ընտրություններ կազմակերպել, և մենք այդ ծրագրից չենք հրաժարվել:
