Անցած օգոստոսից սկսած, երբ Արևմուտքն անցավ Ռուսաստանի նկատմամբ կոշտ պատժամիջոցների կիրառմանը, փորձագետները նշում էին, որ առաջիկայում դա իր կործանարար հետևանքներն է ունենալու նաև Հայաստանի համար, որը միգուցե անգամ Ռուսաստանից ավելի մեծ կորուստներ կրի: Եվ չնայած ԵՏՄ-ին անդամակցության` իշխանությունների կողմից ներկայացվող վարդագույն հեռանկարներին՝ հետզհետե ակնհայտ դարձավ, որ անգամ ոչ իշխանական տնտեսագետների հոռետեսական թվացող կանխատեսումներն իրականում լավատեսական էին: Տարեվերջյան դոլարադրամային ցնցումներին հետևած այս տարվա առաջին երկու ամսվա մակրոտնտեսական ցուցանիշները, մեղմ ասած, մտահոգիչ են. արտահանման կատաստրոֆիկ անկում, ներմուծվող տրանսֆերտների գրեթե կիսով չափ կրճատում, արտաքին պարտքի` թույլատրելի սահմանագծի հատում և, որ ամենավտանգավորն է, բացարձակ անորոշություն առաջիկա տնտեսական իրավիճակի շուրջ: Եվ չնայած այս ամենին` Ազգային վիճակագրական ծառայությունը հաղորդում է, որ նախորդ տարվա համեմատ այս տարվա հունվար- փետրվարին գրանցվել է տնտեսական ակտիվության ցուցանիշի աճ` հասնելով 2,5 տոկոսի:
Նման իրավիճակում ինչպիսի զարգացումների կարող ենք սպասել առաջիկա ամիսներին. այս հարցի շուրջ ԱՆՏԻՆՈՄԻԱՅԻ տաղավարում կանխատեսումներ են անում տնտեսական մեկնաբաններ Հայկ Գևորգյանը և Բաբկեն Թունյանը:
