«Առաջին լրատվական»–ի զրուցակիցն է Հանրապետական խմբակցության ղեկավար Վահրամ Բաղդասարյանը:
– Պարո՛ն Բաղդասարյան, իշխանություններն Ընտրական օրենսգիրքը փոփոխության ենթարկելու մասին քննարկումնե՞ր են անցկացնում:
– Ընտրական օրենսգրքի հետ կապված քննարկումներ պետք է լինեն: Այժմ քննարկումները գնում են սահմանադրական փոփոխությունների հայեցակարգի շրջանակներում: Բնականաբար, այդ երկու փոփոխությունները միմյանց հետ ուղղակի, թե անուղղակի կերպով կապված են: Եվ ինձ թվում է, որ մինչև 2017թ. Ընտրական օրենսգրքում փոփոխություններ կկատարվեն: Այդ հարցը պետք է քննարկել նաև բոլոր քաղաքական ուժերի հետ: Իմ տեղեկություններով` քաղաքական ուժերն արդեն պատրաստում են իրենց առաջարկությունները, և լայնածավալ քննարկումներ կազմակերպվեն:
– ՀՀԿ-ն Ընտրական օրենսգրքում ի՞նչ փոփոխություններ է ցանկանում կատարել:
– Կոնկրետ Ընտրական օրենսգրքի հետ կապված` ՀՀԿ-ում առայժմ որոշակիություն չկա, բայց ՀՀԿ անդամները պատրաստում են իրենց առաջարկությունները և բոլոր կետերին պետք է հերթականությամբ անդրադառնան: Եվ մենք կանդրադառնանք ընտրությունների հետ կապված` միջազգային կառույցների բարձրացրած այն բոլոր հարցերին, որոնք անհանգստություն են առաջացրել:
– Դուք դիմել եք քաղաքական ուժերին, որ Ընտրական օրենսգրքի փոփոխությունների հետ կապված առաջարկություննե՞ր ներկայացնեն:
– Ոչ: Տարբեր քաղաքական ուժերի կողմից առաջարկություններ են եղել: ԱԺ-ում ներկա բոլոր քաղաքական ուժերն էլ հայտարարել են, որ Ընտրական օրենսգիրքը փոփոխությունների կարիք ունի: Մենք նույնպես ասում ենք, որ, այո, կա դրա կարիք: Եվ եթե մենք սահմանադրական փոփոխությունների գնանք, ու երկրում կառավարման մոդել փոխվի, պետք է նոր մոտեցում ցուցաբերենք նաև Ընտրական օրենսգրքի նկատմամբ:
– Դուք պատրա՞ստ եք ընդունել ընդդիմության հիմնական՝ ընտրություններից հետո ընտրողների ցուցակները հրապարակելու առաջարկը:
– Միգուցե ոչ այդ տեսքով, բայց մենք կգտնենք այն մեխանիզմը, որն ավելի հրապարակային կդարձնի այդ խնդիրը:
– Եվրամիությունը Հայաստանի մասին զեկույց հրապարակեց, որում շեշտվում է, որ Հայաստանը 2014թ. սահմանափակ առաջընթաց է գրանցել ժողովրդավարության, մարդու իրավունքների և հիմնարար ազատությունների ոլորտներում:
– Ինձ թվում է, որ ԵՄ-ի մոնիթորինգը բավական հին է, և պարզապես չկամություն է, որ փոփոխությունները չնկատվեն: Այսօր հեռուստատեսությամբ մեծ մասամբ ընդդիմադիր գործընկերներին են լուսաբանում:
– Բայց հեռուստաընկերությունները հիմնականում վերահսկվում են իշխանությունների կողմից:
– Համենայն դեպս, երբ ես դիտում եմ հեռուստահաղորդումները, կարծես վերահսկողության էլեմենտներ չեմ նկատում: Ես տեսնում եմ, որ բոլոր հեռուստաընկերություններում ընդդիմադիրներն են խոսում:
– ԵՄ զեկույցում նաև նշված է, որ սահմանադրական փոփոխությունների շուրջ կոնսոլիդացիա չկա:
– Միանշանակ հայտարարում եմ և նշում, որ քաղաքական կոնսոլիդացիան օր օրի գնալով ավելի է ընդլայնվում: Ինձ թվում է` դրանք ամիսներ առաջ արված մոնիթորինգի արդյունքներ են եղել, երբ սահմանադրական փոփոխությունների հայեցակարգը նոր էր մատուցվում հանրությանը: Խորհրդարանում գործող քաղաքական ուժերի մեծ մասը հայտարարում էր, թե չեն ցանկանում այն ուսումնասիրել, որովհետև իրենք գնալու են ընտրությունների:
– Ամիսներ առաջ ասելով՝ նկատի ունեք մինչև «Բարգավաճ Հայաստան» կուսակցության շուրջ տեղի ունեցող վերջին իրադարձություննե՞րը:
– Ես չգիտեմ, ժամանակները դուք կարող եք որոշել: Համենայն դեպս, մենք արդեն քաղաքական դաշտում հասել ենք այն վիճակին, որ արդեն բոլորն ուսումնասիրում են սահմանադրական փոփոխությունների հայեցակարգը: Եվ տեսնում ենք դրա արդյունքը՝ բանակցությունները ՀՀ նախագահի հետ, տարբեր ձևաչափերով հանդիպումներն ու քննարկումները: Կարելի է ասել, որ լայն քննարկումներ են ծավալվել նաև հանրային սեկտորի հետ: Դուք ականատես կլինեք, որ լայն կոնսոլիդացիան ապահովված կլինի:
