Սիրիայում, որտեղ 2011 թվականից շարունակվում է զինված հակամարտությունը, ժամանակավորապես տեղահանվածների թիվը մի քանի միլիոն է, սակայն արևմտյան ԶԼՄ-ները զգալիորեն չափազանցում են նրանց թիվը՝ ներխուժումը հիմնավորելու համար: RIA Novosti-ի հաղորդմամբ՝ այս մասին ռուս լրագրողներին ասել է Սիրիայի նախագահ Բաշար Ասադը:
«Ահաբեկիչներն ամենասկզբից դիմում էին կարգախոսների, որոնք սերմանում էին կրոնական և էթնիկական երկպառակություն: Դրանց նպատակն էր սիրիական հասարակությանը ստիպել լքել երկիրը և Սիրիան վերածել մոնոկրոնական պետության: Իսկ այնտեղ, որտեղ չկա բազմազանություն, միշտ բարգավաճում է արմատականությունը: Ճշմարտությունն այն է, որ ահաբեկիչները հարձակվել են ոչ միայն փոքրամասնությունների վրա, նրանք հարձակվել են Սիրիայի բոլոր քաղաքացիների վրա: Այդ կարգախոսները պետք էին սիրիական հասարակությանը պառակտելու համար: Եվ եթե մենք պաշտպանեինք միայն փոքրամասնություններին, ահաբեկիչներին կօգնեինք իրագործել մտածածը»,- հայտարարել է նա:
Ինչ վերաբերում է փախստականների թվին՝ Ասադի խոսքով՝ Սիրիայի իշխանությունները ստույգ վիճակագրություն չունեն:
«Այդ ցուցանիշն ամեն օր փոխվում է: Շատ մարդիկ Սիրիայի մի շրջանից տեղափոխվում են այլ շրջան՝ իրենց հարազատների մոտ: Այդ պատճառով նրանք չեն դասվում ժամանակավորապես տեղափոխված անձանց թվին: Իհարկե, ժամանակավորապես տեղափոխված անձանց ընդհանուր թիվը մի քանի միլիոն է: Սակայն արտասահմանյան ԶԼՄ-ներն էականորեն չափազանցում են նրանց թիվը՝ որպես պատրվակ իրականացնելու համար զինված մարդասիրական ինտերվենցիա»,- ասել է Ասադը:
ՄԱԿ-ի տվյալներով՝ հակամարտության հետևանքով տուժել է (մարդասիրական աջակցության կարիք ունի) ավելի քան 12 մլն մարդ, մոտ 4 մլն սիրիացի փախստական է դարձել, ևս ավելի քան 7 մլն՝ ներքին տեղափոխված:
Ասադի խոսքով՝ Սիրիայի պետությունը հոգում է նրանց համար, ովքեր զրկվել են տանիքից: «Հարկադիր տեղափոխված անձանց ժամանակավոր տեղավորման կենտրոններ են ստեղծվել, որոնց ցուցաբերվում է բժշկական և պարենային օգնություն, ապահովվում է նրանց երեխաների համար դպրոցական կրթության հասանելիությունը: Իհարկե, մենք չենք կարող լիարժեք փոխհատուցել նրանց նախկին կենսամակարդակը, բայց այդ միջոցառումները ժամանակավոր բնույթ ունեն՝ մինչև նրանք վերադառնան հարազատ տներ»,- ասել է նա:
