Օրերս հայտնի դարձավ, որ Անկարայի քաղաքապետ, Թուրքիայի իշխող «Արդարություն և զարգացում» կուսակցության անդամ Մելիհ Գյոքչեքը դատական հայց է ներկայացրել Թուրքիայում հայտնի հայ հասարակական գործիչ, լրագրող Հայկո Բաղդատի դեմ, որը կատակով իրեն հայ էր անվանել։ Ստեղծված իրավիճակի մասին Բաղդատը զրուցել է Թուրքիայում լույս տեսնող հայկական «Ակօս» շաբաթաթերթի հետ։
«Մենք խոսում ենք մի մարդու մասին, որն իրեն դուր չեկած մարդկանց ասում է՝ «դու հա՞յ ես»։ Եթե որևէ մեկին հայ անվանելը վիրավորանք է, ապա Մելիհ Գյոքչեքը պետք է 10 հազար լիրայից շատ ավելի մեծ տուգանք վճարի։ Նա քաղաքական գործիչ է, որը ազգությամբ մի հայի կողմից հայ է անվանվում՝ դա համարելով վիրավորանք։ Սա իսկական պարոդիա է», – ասել է Բաղդատը։
Փաստաբան Էրդալ Դողանը, իր հերթին, հայտարարել է, որ իրականում հայերը պետք է դատական հայց ներկայացնեն Գյոքչեքի դեմ։
Հիշեցնենք, որ Անկարայի քաղաքապետը դատական հայց էր ներկայացրել Բաղդատի դեմ, որը «Թվիթերի» իր միկրոբլոգում գրել էր. «Սա պաշտոնական է. նրանք մայրաքաղաքը հանձնել են հայի։ Ինչ ամոթ է»։
Այժմ Գյոքչեքը դիմել է դատարան՝ պնդելով, որ իրեն հայ անվանելով՝ վիրավորել են։ Քաղաքապետը 10 հազար լիրա (շուրջ 4000 ԱՄՆ դոլար) է պահանջում՝ որպես բարոյական վնասի փոխհատուցում։
«Ժողովրդի կողմից այդքան սիրված ու հարգված մարդու մասին գարշանք պարունակող իմաստով բառ ասելը պարզապես անձնական վիրավորանք է», – նշվում է Գյոքչեքի փաստաբանի հայտարարության մեջ։
Հայկո Բաղդատն արդեն արձագանքել է քաղաքապետի այս քայլին՝ «Թվիթերում» անելով հետևյալ գրառումը. «Մելիհ Գյոքչեքն իմ դեմ հայց է ներկայացրել և 10 հազար լիրա է պահանջում իրեն հայ անվանելու համար։ Մենք պատրաստվում ենք մի լավ զվարճանալ»։
Հավելենք, որ Բաղդատը սոցիալական ցանցերում կատարած գրառումներում օգտագործում է #melihgökçekermeniymiş (Մելիհ Գյոքչեքը հայ է) հեշթեգը։
Հիշեցնենք նաև, որ վերջերս Մելիհ Գյոքչեքը թվիթերյան իր միկրոբլոգում գրառում էր կատարել, որում քննադատել էր մարտի 12-ին Ծիծեռնակաբերդ այցելած Գերմանիայի կանաչների կուսակցության՝ ծագումով թուրք համանախագահ Ջեմ Օզդեմիրին։ Անկարայի քաղաքապետը, մասնավորապես, գրել էր. «Գերմանիայի կանաչների կուսակցության ղեկավարին հարց ունեմ։ Խնդրում եմ, պատասխանի´ր, Ջե´մ Օզդեմիր, դու արմատներով հա՞յ ես»։ Այս խոսքերից հետո էլ Հայկո Բաղդատն արել էր վերը նշված գրառումն Անկարայի քաղաքապետի մասին: