Սիրիայում կյանքի միջին տևողությունը 20 տարով կրճատվել է երկրում շարունակվող հակամարտության հետևանքով։ Այս մասին հայտնել է մարդասիրական հարցերով ՄԱԿ-ի գլխավոր քարտուղարի տեղակալ Վալերի Ամոսը՝ փոխանցում է RIA Novosti-ն։
Նշվում է, որ գործազրկությունը կազմում է 58 տոկոս. ցուցանիշը 2010 թվականից աճել է 10 տոկոսով։ Սիրիացիների մոտ 2/3-ն ապրում է աղքատության մեջ։ Այս մասին Ամոսը հայտնել է Սիրիայում մարդասիրական վիճակին վերաբերող ԱԽ հանդիպման ժամանակ։
Ամոսը հայտարարել է, որ եթե սիրիական ճգնաժամին քաղաքական լուծում չգտնվի, միլիոնավոր մարդկանց կյանքն էլ ավելի կվատթարանա։ Մարդիկ պաշարված են մնում բնակավայրերում ինչպես կառավարական զորքերի, այնպես էլ գրոհայինների կողմից։ Պաշարման մեջ գտնվող մարդկանց թիվը 212 հազարից դարձել է 440 հազար։
5.6 մլն երեխաներ օգնության սուր կարիք ունեն, մանուկների սնուցման մակարդակը սաստիկ ընկել է։ Առողջապահական համակարգը կործանված է, աշխատում է առաջնային օգնության ցուցաբերման հաստատությունների միայն կեսը։
