«Առաջին լրատվական»-ի զրուցակիցն է ՀՀ փոքր ՀԷԿ-երի միության նախագահ, Երևանի ավագանու անդամ Նաիրա Նահապետյանը:
– Տիկին Նահապետյան, ՀՀ էներգետիկայի նախարար Երվանդ Զախարյանը իր վերջին հարցազրույցում չբացառեց առաջիկայում էլեկտրաէներգիայի թանկացման հնարավորությունը՝ պայմանավորված ՀԷՑ-ի սնանկացման հետ: Դուք որքանո՞վ եք իրատեսական համարում հոսանքի թանկացումը, և ի՞նչ ժամկետներում է դա հնարավոր:
– Այո, արդեն երրորդ ամիսն է, որ ՀԷՑ-երը չեն կարողանում վճարել արտադրված էլեկտրաէներգիայի սպառման գումարները: Իսկ փոքր ՀԷԿ-երը արտադրում են ամենաէժան էլեկտրաէներգիան՝ միջինը 15-17 դրամ 1 կիլովատտի դիմաց: Բայց ասեմ, որ սնանկացման գործընթաց դեռևս չկա, քանի որ ՀԷՑ-երը վերցրել են բավական մեծ վարկային միջոցներ: Ասեմ նաև, որ հարցը դուրս է եկել մեր տիրույթից, և խնդրին տեղյակ են և հանրապետության նախագահը, և էներգետիկայի նախարարը, ինչպես նաև հանրային ծառայությունները կարգավորող հանձնաժողովը, սակայն սակագնի հետ կապված որևէ հարց դեռ չկա, դրանք դեռ խոսակցություններ են:
– Իսկ Ձեր կարծիքով՝ ո՞րն է ՀԷՑ-ի սնանկացման իրական պատճառը:
– Ես ինքս եմ անձամբ վարում բոլոր խոսակցությունները Բիբինի հետ: Ասեմ, որ առայժմ ոչ մի խոսակցություն չկա սակագնի, սեփականատիրոջ փոփոխության շուրջ: Ինչ վերաբերում է պարտքին, ապա նրա ներկայացմամբ՝ խնդիրն այն է, որ անցած տարի, երբ հիդրոկայանների ջրային ռեսուրսները բավականին քիչ էին, իրենք հոսանք ստանալու համար բավական գազ են սպառել, որը թանկ հաճույք է, և այդ պատճառով էլ մեծ պարտքերի տակ են ընկել: Այսինքն՝ անցած տարվա սակավաջուր լինելու, ջրի պակասի պատճառով են պարտքերը կուտակվել, որը մարելու համար մեծ վարկային փաթեթ է վերցվել:
– Բայց կարո՞ղ էր միայն գազի սպառումից այդքան մեծ պարտք կուտակվել:
– Բիբինի ներկայացմամբ՝ սա 3 տարվա պարտք է: Պարտքերը սկսել են կուտակվել 2011 թվականից, և մինչև 2014 թվականը 220 միլիոն դոլարի պարտքային փաթեթ է առաջացել: Բայց թե ինչու է Բիբինը այդքան պարտք կուտակել՝ մենք չենք կարող պարզաբանել: Դա աուդիտորական քննությունը կպարզի:
– Իսկ ՀՀ քաղաքացին պարտավո՞ր է ավելի թանկ վճարելով մարել ռուսական ընկերության պարտքը:
– Ոչ, ես կարծում եմ, որ առանց այն էլ ՀՀ քաղաքացին անցած տարի ունեցավ բավականին մեծ բեռ: Եվ հիմա նոր թանկացումը բավականին ծանր կլինի քաղաքացու համար: Դրա համար, կարծում եմ, մենք ամեն ինչ պետք է անենք խնդրի կարգավորման ուղղությամբ:
Առավել մանրամասն՝ տեսանյութում։
