Մանհեթենի շրջանում բնակելի շենքում տեղի ունեցած պայթյունի ու մասնակի փլուզման հետևանքով առնվազն 30 մարդ է տուժել։ Նրանցից 3-ի վիճակը ծանր է։
Պայթյունից հետո շենքում հրդեհ է բռնկվել։ Հրդեհը տարածվել է մի քանի հարկերում։ Հարակից շինությունների բնակիչները տարհանվել են։ Փրկարարները չեն բացառում, որ փլատակների տակ կարող են մարդիկ գտնվել։ Նշվում է, որ հրդեհված շենքի առաջին հարկում տեղակայված է եղել ռեստորան։
Պայթյունի և փլուզման պատճառը, ըստ նախնական տեղեկությունների, եղել է գազի արտահոսքը։ Այս մասին հայտնել է քաղաքապետ Բիլ դե Բլազիոն՝ փոխանցում է BBC-ն։
Նրա խոսքով՝ վթարի մեղավորները շինարարներն են, ովքեր ռեստորանում վնասել են գազատարը։ Նա հայտնել է նաև, որ հրդեհը վնասել է հարակից 4 շինությունները։
Հրշեջները մտավախություն ունեն, որ շենքը կարող է ամբողջությամբ փլուզվել։