«Իշխանափոխությունը յուրաքանչյուր լուրջ կուսակցության, եթե այդ կուսակցությունն իշխանությունում չի ընդգրկված, համար մեկ խնդիրն է: Եվ եթե մի քաղաքական գործիչ կարող է հայտարարել, որ ինքը, լինելով ընդդիմություն, չի ցանկանում իշխանափոխություն, ուրեմն այդ մարդը քաղաքականությամբ չի զբաղվում»,- հայտարարեց «Բարգավաճ Հայաստան» խմբակցության անդամ Վահան Բաբայանը՝ պատասխանելով «Առաջին լրատվական»-ի հարցին, թե ԲՀԿ-ն այսուհետ կշարունակի՞ իշխանափոխություն պահանջել:
«Այդ դեպքում ԲՀԿ-ն նախկինի նման հրաժարականի պահանջ կդնի՞» հարցին էլ պատգամավորն այսպես պատասխանեց. «ԲՀԿ-ն իր կոլեգիալ որոշումները կկայացնի պատեհ պահի, երբ կլինեն նման քննարկումներ և որոշումներ: Այո, կարող է և իրականացնել, քաղաքական տարբեր անձերի, կուսակցությունների, քաղաքական տարբեր գործընթացների վերաբերյալ իր կարծիքները հայտնել: Մենք որևէ բանով կաշկանդված չենք եղել և կաշկանդված չենք»: