Սոթքի եւ Մեղրաձորի ոսկու հանքավայրերի ապօրինի եւ անբարեխիղճ օգտագործման վերաբերյալ արձանագրված խախտումների արդյունքները ՀՀ Վերահսկիչ պալատը ներկայացրել է ՀՀ կառավարություն` պահանջելով վերանայել այդ հանքերի օգտագործման համար տրված լիցենզիայի վավեր լինելու, ընկերության լիցենզիայի դադարեցման, 2004-2008թ.թ. անօրինական հանքարդյունահանման, ինչպես նաեւ օրենսդրական պայմանագրերի խախտումների չարձանագրման հարցերը: Նկատենք, որ Հայաստանի բնական հարստությունը համարվող ընդերքի անօրինական օգտագործողները պետք է քրեական պատասխանատվության ենթարկվեն, եւ ոչ թե կառավարությունը պարզապես քննարկի ապօրինի արդյունահանում իրականացրած ընկերության լիցենզիան դադարեցնելու հարցը, սակայն ՎՊ-ն դիմել է միայն կառավարություն, իսկ դատախազություն դիմել դեռեւս չի պատրաստվում: ՎՊ նախագահ Իշխան Զաքարյանը համաձայն է, որ ընդերքի նկատմամբ ցանկացած ոտնձգություն դատապարտելի է. «Ընդերքը պետության հարստությունն է, եւ ընդերքի նկատմամբ անխնա վերաբերմունքը կամ պայմանագրով մի քանի տարի վերցնելը եւ ոչինչ չանելով՝ ինչ-որ բաներ կորզելը անընդունելի է»:
Նա շեշտեց, որ ՎՊ-ն առայժմ դրել է հանքավայրի օգտագործման լիցենզիայի դադարեցման հարցը, սակայն ուսումնասիրությունները դեռեւս շարունակվում են. «Չեմ բացառում, որ մի օր որոշակի այլ ինֆորմացիաների կուտակման դեպքում մենք դիմենք նաեւ դատախազություն»: