Այս օրերին բավական բուռն իրադարձություններ են տեղի ունենում հարևան Վրաստանում: Երկրի նախկին նախագահ Միխեիլ Սաակաշվիլու գլխավորած «Միացյալ ազգային շարժումը» նախաձեռնել է կառավարությանը պաշտոնանկ անելու գործընթաց: Այս պահանջով հազարավոր վրացիներ, ակցիան նախաձեռնողների խոսքերով՝մոտ 50․000 մարդ, Թբիլիսիիում բողոքի երթեր և հանրահավաքներ են կազմակերպում:
Վրաստանի նոր կառավարությունից առանձնապես գոհ չեն նաև հայերը: Թեպետ ժամանակին վիրահայերը ծայրաստիճան դժգոհ էին Միխեիլ Սաակաշվիլու իշխանությունից՝ նրան մեղադրում էին քաղաքական հետապնդումներ իրականացնելու, նախընտրական խոստումները չկատարելու, նույնիսկ` իրենց հալածելու մեջ, հիմա էլ առանձնապես գոհ չեն իշխող «Վրացական երազանք»-ից:
Մեր աղբյուրները հաղորդում են, որ այս օրերին Վրաստանում տեղի ունեցող բողոքի ցույցերին հայկական կազմակերպություններ կազմակերպված չեն մասնակցում: Այդուհանդերձ, ակցիայի մասնակիցների մեջ կարելի է տեսնել նաև հայերի, ովքեր հրապարակ են գալիս սեփական նախաձեռնությամբ:
Այս տեղեկությունը վերահաստատեցին նաև Ջավախքում: Շրջանային ժողովի պատգամավոր Ֆյոդոր Թորոսյանն ընդգծեց, որ խիստ դժգոհ են այս կառավարությունից և գործող իշխանություններից, բայց չեն գնա Թբիլիսիի, չեն պահանջի հրաժարականներ, որովհետև եկող կառավարությունն ավելի լավը չի լինելու: «Մենք շատ մեծ պահանջներ ունենք այս իշխանությունների նկատմամբ, շատ հարցեր ու խնդիրներ կան, որոնք այդպես էլ լուծում չեն ստանում: Բայց կարծում եմ, որ դա բացարձակապես չի նշանակում, որ մենք պետք է փողոց դուրս գանք: Իշխանությունները փոխվում են, բայց ոչինչ չի փոխվում այն քաղաքականության մեջ, որ նրանք վարում են մեր նկատմամբ: Ավելորդ է լինում նրանց դեմ լինել, սրանց պաշտպանել կամ հակառակը»,- ասաց նա:
Հավելենք, որ ընդդիմադիր «Ազատ դեմոկրատներ» կուսակցությունը, որի ղեկավարը Վրաստանի պաշտպանության նախկին նախարար Իրակլի Ալասանիան է, ևս հայտարարել է, որ իրենք կողմ են կառավարության հրաժարականին, սակայն առանց մտածելու չեն միանա այս հարցով ամեն գործընթացի:
