«Դրամի արժեզրկում պետք չէ, մի մոռացեք, որ մեծ մասամբ ապրանքները ոչ թե արտահանում, այլ ներկրում ենք, դուք պատկերացրեք՝ սկսած շաքարից, ցորենից, ամեն ինչ ահավոր թանկանալու է, կատաստրոֆա է լինելու»,- «Առաջին լրատվական»-ի հետ զրույցում ասաց Հայաստանի արտահանողների միության նախագահ Րաֆֆի Մխչյանը՝ հավելելով, որ չի կիսում այն գործարարների տեսակետը, թե դոլարը պետք է լինի 700-800 դրամ, որպեսզի արտահանումը խթանվի, ապրանքներն արտահանելիս մրցունակ լինեն, և Հայաստանի տնտեսությունն էլ որոշակի առումով կայունանա:
Րաֆֆի Մխչյանը բացատրեց, որ գործարարներն արտահանելիս խնդիրների առջև են կանգնում ոչ թե դրամի, այլ արժեզրկված ռուբլու պատճառով, քանի որ մինչև ռուբլու տապալումն ունեին ռուբլով պայմանավորվածություններ, բայց ԵՏՄ մտնելուց հետո «հետռուբլային» առևտուր տեղի չի ունենում: «Փորձում են հայ գործարարներն իրենց ապրանքը դոլարով առաջարկել մեր գործընկերներին՝ ձեռնտու չի լինում, որովհետև ինքնին ռուբլին այսօր շատ էժան է, դրամի խնդիրը չէ, այլ ռուբլու, իրենց ինֆլացիայի պատճառով չեն կարողանում դոլարով գնել և տեղավորել իրենց գնային սահմանների մեջ»,- մանրամասնեց Ր. Մխչյանը: Նա շեշտեց, որ ՌԴ Կենտրոնական բանկը խիստ վերահսկում է, և ծայրահեղ դեպքերում է շուկայում գնաճ արձանագրվում: Ըստ նրա՝ եթե ռուբլին շուտափույթ չկայունանա, խնդիրները չեն կարող հարթվել: «Այսօր Ռուսաստանից շատ ենք տառապում, մեր դժբախտությունը գալիս է ՌԴ-ից ահավոր կախվածությունից, պետք է նոր շուկաներ փնտրենք, այլընտրանք»,- շեշտեց մեր զրուցակիցը: Նա նաև տեղեկացրեց, որ նախորդ տարվա նույն ժամանակահատվածի համեմատ արտահանումը նվազել է 20-25 տոկոսով: Ինչպես արդեն ասվեց, արտահանումների ծավալը պակասել է առաջին՝ ռազմավարական դաշնակից Ռուսաստանի տնտեսական վիճակի վատթարացման, երկրորդ՝ օրեցօր պակասող ազգաբնակչության, աշխատող ձեռքերի ու մասնագետների պատճառով: «Պետք է զարկ տալ թեթև արդյունաբերությանը, ինչպես նաև չբավարարվել ԵՏՄ շուկայով, բարձրացնել ապրանքների մրցունակությունը եվրոպական շուկաներում»,- ասաց նա: Րաֆֆի Մխչյանը նկատեց, որ մեր՝ մղձավանջային իրավիճակից դուրս գալու ելքը նոր շուկաներում հաստատվելն է: «Ժամանակը եկել է վերազինվելու, տեսեք՝ անգամ աշխատուժը, խոպանչիները ՌԴ-ում են, տրանսֆերները 50-60 տոկոսով նվազել են, մեր գլոբալ դժբախտությունը գալիս է ՌԴ-ից»,- ասաց նա:
Մեր արտահանողները տուժում են նաև միջազգային շուկայում պղնձի և մետաղի գների անկումից, որը բերում է նրան, որ հսկաները, որոնք մեծ թվով աշխատատեղեր ունեն, այսօր իրենց գործունեությունը համարյա դադարեցրել են, չեն վաճառում իրենց ապրանքը՝ սպասելով միջազգային շուկայի կայունացմանը, այդ թվում՝ Զանգեզուրի պղնձամոլիբդենայինը: «Իրենք այդ մոլիբդենի խտանյութը վաճառում են համաշխարհային շուկայում. Պատկերացրեք՝ մեկ տոննան 8500 դոլարից իջել էր մինչև 5300 դոլարի»,- մանրամասնեց Րաֆֆի Մխչյանը: Ըստ նրա՝ այս պահին պետք չէ սպասել հրաշքների և հուսալ, որ կարճ ժամկետում խնդիրները կլուծվեն:
Մանրամասները՝ տեսանյութում: