Գործարար Սամվել Մայրապետյանին պատկանող Local Developers ընկերության և Երևանի կենտրոնի Տերյան 23, 25 և Լալայանց 37 շենքերի բնակիչների միջև սեփականության իրավունքի շուրջ վեճը դատական ատյաններում շարունակվում է։ Այսօր դատական նիստից առաջ բնակիչները Հյուսիսային պողոտայից երթով եկել էին կառավարության դիմաց՝ պարզելով «Ո՛չ քանդելուն» գրությամբ պաստառներ և պահանջելով վերջ դնել անօրինականությանը:
«Մեր քաղաքը» նախաձեռնության անդամ, բնակիչ Վարդան Գերավետյանը «Առաջին լրատվական»-ի հետ զրույցում ասաց, որ կոնկրետ հարցադրմամբ են եկել. «Ունենք հարցադրում վարչապետին՝ կոռուպցիայի դեմ այս կոչեցյալ պայքարը թիրախավորված էր միայն մի անձի՞ դեմ՝ Ծառուկյանի դեմ սա անձնական հաշիվներ մաքրե՞լ էր, թե՞ ընդհանուր բնույթ է կրում»:
Գերավետյանը նշեց՝ եթե պայքարը ընդհանուր է, ուրեմն պահանջում են, որպեսզի ուսումնասիրվեն Ռոբերտ Քոչարյանի ժամանակվանից մեծ ֆինանսական վերելք ապրած Սամվել Մայրապետյանի գործերը:
Բնակիչները պնդեցին, որ 2007թ.-ից մեկնարկած կենտրոնի շինարարությունը անօրինական է և չի բխում հանրության շահերից, ուստի իրենք չեն պատրաստվում լքել իրենց բնակարանները:
22 բնակարանների տերերը նշեցին, որ իրենք գերակա շահի գերին չեն, մանավանդ այն պարագայում, երբ գերակա շահ է հայտարարվում և փոխարենը կառուցվում ակումբ կամ սրճարան. «Նախ՝ մեզ հանում են մեր պապական տներից՝ Երևանի կենտրոնից, ու առաջարկում են 1 քառակուսի մետրի համար մոտ 800 դոլար, ինչն ընդհանրապես չի կարելի համարել համարժեք փոխհատուցում»,- ասացին նրանք:
Բնակիչները կառավարության անդամներին հորդորեցին՝ եթե չեն կարողանում աշխատել, պաշտոնները զիջեն, որպեսզի աշխատի նա, ով կարող է հանրային շահը պաշտպանել։ «Մեղք ենք մենք, սաղ կյանքդ տուն ստեղծես, էսօր քեզ տնիցդ հանեն. մեկը նույն վարչապետին, նույն նախագահին իրանց տներից որ հանի, իրանց հաճելի կլինի՞»,- նշեցին բնակիչները:
Մանրամասները՝ տեսանյութում։