«Սահմանային իրավիճակը վերահսկվում է Հայկական բանակի, մանավանդ` Պաշտպանության բանակի զինծառայողների կողմից: Չկա որևիցե իրադարձություն, որին համարժեք, անգամ` ավելի պատասխան չտանք: Գիտեք, որ վերջինը մարտի 19-ի իրադարձությունն էր, երբ հայկական ստորաբաժանումները, Պաշտպանության բանակի այն դասակը, որը գտնվում էր անմիջապես պաշտպանության գոտում, ուղղակի բարձր մակարդակով, զինծառայողների հերոսությունների, անձնուրացության շնորհիվ կարողացան հետ մղել հակառակորդին, վնաս պատճառել և հնարավորություն ստեղծել, որ հիմնական ուժերը գան, տեղում պատժեն հակառակորդին ու հարցերը լուծեն: Այսօր իրավիճակը վերահսկվում է»,- լրագրողների հետ զրույցում ասաց պաշտպանության նախարար Սեյրան Օհանյանը՝ անդրադառնալով Ադրբեջանի կողմից հայկական սահմանի նկատմամբ կատարված վերջին հարձակումներին:
Նախարարը, սակայն, կարծում է, որ անընդհատ առաջին գծին անդրադառնալու անհրաժեշտություն չկա, որովհետև այսօր Հայկական բանակն այնպիսի պատրաստություն ունի, որ ի վիճակի է ինքնուրույն լուծել այդ խնդիրները: «Երբ անհրաժեշտություն լինի, որ մեր կողքին գտնվեն մեր վետերաններն ու երկրապահները, անհրաժեշտություն լինի արձագանք ակնկալել այլ կազմակերպություններից, ՀԱՊԿ-ից, երևի թե այդ որոշման համար ռազմաքաղաքական ղեկավարությունը համապատասխան քայլ կձեռնարկի: Մենք պատշաճ կերպով իրականացնում ենք մեր առջև դրված խնդիրները»,- ասաց Ս. Օհանյանը:
Ինչ վերաբերում է վերջերս Ադրբեջանի կողմն անցած զինծառայողի քայլին, ապա նախարարն ասաց, որ Ադրբեջանի կողմից սահմանի հատման տեսանյութը արհեստականորեն պատրաստված է: «Նման բան չի եղել, քանի որ այն պահին, երբ նա լքել էր դիրքը, մեր զինծառայողներից մի քանիսը տեսել էին, թե ինչպես է նա արագ վազում: Չի ստացվել կանխել»,- ասաց նա՝ ավելացնելով, թե զինվորի այդ քայլի պատճառները պետք է փնտրել նրա ընտանեկան պայմանների մեջ: «Այն լարվածությունը, որ այսօր գոյություն ունի սահմաններին և շփման գծում, շարունակվում է Ադրբեջանի հետևողական` ավելի լարված դարձնելու քայլերի շնորհիվ, որոնք մի քանի խնդիրներ լուծելու նպատակ ունեն: Բայց միանգամից ակնկալել, որ ԵՏՄ-ին անդամակցելը մեր անվտանգության հարցերն անմիջապես կլուծի, չի կարելի: Մյուս կողմից` չանդամակցելը, մեր ռազմավարական գործընկեր Ռուսաստանի հետ համապատասխան համագործակցություն չունենալը նշանակում է չմտածել ապագայի մասին»,- եզրափակեց Ս. Օհանյանը: