Մեծ Բրիտանիայում ոստիկանությունը հետևում է 4 աշակերտուհիների: Նրանք սովորում են Լոնդոնի այն նույն դպրոցում, որի աշակերտները փետրվարին Սիրիա են մեկնել` ենթադրաբար ԴԱԻՇ (Իրաքի և Շամի իսլամական պետություն) խմբավորման շարքերը համալրելու համար: Այս մասին գրում է Independent պարբերականը:
«Ոստիկանությունը հետևում է 4 աշակերտուհիներին, ովքեր սովորում են Լոնդոնի արևելքում գտնվող այն նույն դպրոցում, որտեղ սովորել են ԴԱԻՇ-ին միանալու համար Մեծ Բրիտանիան լքած երեք աղջիկները: Ընդհանուր առմամբ 7 աշակերտուհիներ` ներառյալ 3 անհետացածները, ոստիկանության տեսադաշտում են հայտնվել արմատականների ազդեցության տակ ընկած լինելու կասկածանքով»,- գրում է պարբերականը:
Պարբերականն այլ մանրամասներ չի հայտնում` նշելով միայն, որ ԴԱԻՇ-ի նոր 4 հետևորդների անունները ներառվել են անհրաժեշտ տվյալների բազաներում, որպեսզի նրանք չկարողանան մյուսների նման ազատ մեկնել Մեծ Բրիտանիայից:
