Իտալիայի Ֆլորենցիա քաղաքի Ռիֆրեդի թատրոնում հայտնի թուրք գրող Էլիֆ Շաֆաքի «Ստամբուլի բիճը» վեպի հիման վրա բեմադրվել է ներկայացում։ Այս մասին հայտնում է թուրքական «Ռադիկալ» պարբերականը։
Սա Շաֆաքի առաջին ստեղծագործությունն է, որը բեմադրվել է թատրոնում։ Պիեսի փակ ցուցադրությունները շարունակվելու են մինչև մարտի 15-ը։
Թուրք մուսուլման Քազանջը ընտանիքի և արմատներով Թուրքիայից Չաքմաքչյան ամերիկահայ ընտանիքի միջև 90 տարի շարունակվող Ստամբուլ-Սան Ֆրանցիսկո կապի մասին պատմող այս ստեղծագործությունը ներկայացնում է թուրք հասարակության ներքին բազմաթիվ խնդիրները, այդ թվում՝ Հայոց ցեղասպանությունը իբրև թուրքի հոգեբանության չհաղթահարվող բարդույթ, ինչպես նաև Մեծ եղեռնից հետո երկու հասարակությունների միջև հարաբերությունները։
Ներկայացման կազմակերպիչները բեմում ստացել են իսկական թուրքական մթնոլորտ. հնչել են թուրք հանրահայտ երգիչներ Թարքանի, Սեզեն Աքսուի, Բաբա Զուլայի երգերը, անգամ ազան են կանչել, աշուրե պատրաստել, թուրքական և հայկական խոհանոցի համեղ ուտեստներով սեղան գցել։ Հատկանշական է, որ գլխավոր դերակատարը եղել է թուրք դերասանուհի Սերրա Յըլմազը։
Նշենք, որ Թուրքիայում Հայոց ցեղասպանության մասին պատմող վեպի հրատարակումից հետո գրքի հեղինակին մեղադրանք էր առաջադրվել «ազգային ինքնությունը վիրավորելու» մասին տխրահռչակ 301-րդ հոդվածով։ Ազգայնականների հետապնդումներից խուսափելու համար 43-ամյա թրքուհին այժմ բնակվում է Լոնդոնում՝ իր ամուսնու և երկու երեխաների հետ։