Ղազախստանը Եվրասիական տնտեսական միության (ԵՏՄ) գործընկերներից ժամանակ է խնդրել՝ մտածելու, թե արդյոք ինքը պատրա՞ստ է չեղարկել ռեզիդենտության սկզբունքը: Ria Novosti-ի հաղորդմամբ՝ այս մասին ուրբաթ օրը Մինսկում հայտնել է Եվրասիական տնտեսական հանձնաժողովի՝ մաքսային համագործակցության հարցերով նախարար Վլադիմիր Գոշինը:
Այժմ տնտեսվարող սուբյեկտները կարող են ապրանքների արտահանման կամ ներկրման ժամանակ մաքսային հայտարարագիր ներկայացնել երկրում, որի ռեզիդենտն են: 2015թ. առաջին կիսամյակում Եվրասիական տնտեսական հանձնաժողովը և ԵՏՄ անդամ երկրների կառավարությունները ծրագրել են մշակել միջոցառումների ծրագիր, որոնք բիզնեսին հնարավորություն կտան 2020թ. հունվարի 1-ից մաքսային գործողություններ իրականացնել միության ցանկացած երկրում:
«Ղազախստանը հանկարծ ասաց, որ իրենք պետք է դեռ լրացուցիչ քննարկեն այդ հարցը, նրանք պատրաստ չեն ռեզիդենտության չեղարկման մասին հարցի լուծմանը: Ղազախստանը դեռ ժամանակ է վերցրել՝ մտածելու համար»,- մամլո ասուլիսի ժամանակ ասել է Գոշինը:
Եվրասիական տնտեսական հանձնաժողովի նախարարը նշել է, որ սպասվում էր, որ այդ հարցն ավելի հեշտ ու արագ կլուծվի:
Գոշինը պատմել է, որ ռեզիդենտության չեղարկման մասին հարցը ծրագրվում է քննարկել միության անդամ երկրների վարչապետների հանդիպմանը, որը նախատեսվում է մայիսի 29-ին Ղազախստանում: «Մեզ կետ է պետք այդ հարցում, նրանք (Ղազախստանը) պետք է ասեն՝ արդյոք դա արդիակա՞ն է, այդ ժամանակ հանձնաժողովը կշարունակի աշխատել այդ ուղղությամբ»,- նշել է նա:
Նախարարի խոսքով՝ այդ հանդիպման ընթացքում կառավարությունների ղեկավարները կարող են ԵՏՄ մաքսային օրենսգքրի նախագծի հետ կապված այլ վիճելի հարցեր ևս քննարկել: