ԱՄՆ Կոնգրեսը հրաժարվել է հաջորդ շաբաթ Իրանի միջուկային ծրագրին առնչվող օրինագծի շուրջ քվեարկություն անցկացնելու փորձերից։ Օրինագիծը Կոնգրեսին իրավունք կտա քննարկել միջուկային ծրագրի կարգավորման մասին պայմանավորվածությունները՝ Թեհրանի և «վեցյակի» միջև այդպիսիք ձեռք բերվելու դեպքում։ Այս մասին փոխանցում է TASS գործակալությունը։
Այդ օրինագծի շուրջ շուտափույթ քվեարկության կազմակերպման նախաձեռնողը Հանրապետական կուսակցությունն է։ Սակայն հինգշաբթի Սենատում հանրապետական մեծամասնության առաջնորդ Միտչ Մաքքոնելը որոշել է հետաձգել այդ օրինագծով նախանշված դեբատներն ու քվեարկությունը։
Նրա մամլո քարտուղարը հաստատել է, որ երեքշաբթի ծրագրված ընթացակարգային քվեարկությունը փաստաթղթի վերաբերյալ չի կայանա։
Մինչ Թեհրանի հետ «5+1» խմբի բանացությունների ավարտը օրինագծի շուրջ դեբատների մեկնարկին դեմ են հանդես եկել դեմոկրատ օրենսդիրները։
ԱՄՆ նախագահ Բարաք Օբաման վերջին շաբաթներին կոչ է արել Կոնգրեսին չմիջամտել Իրանի հետ բանակցությունների ընթացքին։