Արդեն հայտնել ենք, որ մարտի 3-ին հունահռոմեական ոճի անվանի հայ ըմբիշ, Եվրոպայի (1986թ), աշխարհի (1986թ) և 24-րդ օլիմպիական խաղերի չեմպիոն (1988թ), ԽՍՀՄ սպորտի վաստակավոր վարպետ, ՀՀ վաստակավոր մարզիչ Լևոն Ջուլֆալակյանը այցելել է Երևանի Դավիթաշեն համայնքում գտնվող թիվ 200 հիմնական դպրոց և բավարարեց ուսուցչական կազմի ու աշակերտների բազմազան հարցերով հագեցած հետաքրքրությունների շրջանակը: Հանդիպման ավարտից հետո Հայաստանի ըմբշամարտի ֆեդերացիայի թղթակիցը ճեպազրույց ունեցավ Լևոն Ջուլֆալակյանի հետ:
–Բոլորվին վերջերս Ծաղկաձորում գտնվելիս ձեզ մոտ առողջական խնդիրներ էին ծագել և դուք շտապ կարգով Երևան տեղափոխվեցիք: Ինչպե՞ս եք հիմա ձեզ զգում:
-Այո, հունվարի 2-րդ կեսին Ծաղկաձորում դահուկներով սահելիս հանկարծակի վատ զգացի: Ինձ անմիջապես Երևանի «Էրեբունի» բժշկական կենտրոն տեղափոխեցին: Շտապ կարգով կատարած սրտիս ստենդավորումից հետո բարեբախտաբար ամեն ինչ բարեհաջող է ընթանում, առողջական խնդիրներ կամ գանգատներ չունեմ: Վերջին ստուգումից հետո բժիշկները հավաստիացրին, որ ես հիմա 18 տարեկանի առողջություն ունեմ (նշենք, որ Լևոն Ջուլֆալակյանն ապրիլի 5-ին կդառնա 51 տարեկան):
–Հավաքականի մոտակա ծրագրերի մասին կխոսե՞ք:
-Հավաքականը մարտի 8-21-ը ուումնամարզական հավաք կանցկացնի Երևանում գտնվող Հայաստանի հավաքական թիմերի մարզական կենտրոնում: Դրան անմիջապես կհաջորդի մարտի 24-29-ը Լեհաստանի Վալբրզիչ քաղաքում առաջին անգամ կազմակերպվող անցումային տարիքի՝ մինչև 23 տարեկանների ըմբշամարտի Եվրոպայի անդրանիկ առաջնությունը: Ապրիլի 8-23-ը երկշաբաթյա ուսումնամարզական հավաք է նախատեսված կրկին Երևանում: Ապա կհաջորդի մասնակցությունը ապրիլի 24-26-ը Սոֆիայում ավանդաբար կազմակերպվող Դան Կոլով և Նիկոլա Պետրով միջագային մրցաշարին:
Բնականաբար, ըմբիշների համար մրցաշրջանի գլխավոր իրադարձությունը սեպտեմբերի 7-12-ը ամերիկյան Լաս Վեգաս քաղաքում կայանալիք աշխարհի առաջնությունն է, որը նաև օլիմպիական վարկանիշային մրցաշարի կարգավիճակ ունի: Այս տարվա գլխավոր նպատակն աշխարհի առաջնությունում հաջող հանդես գալն ու որքան հնարավոր է շատ վարկանիշներ ձեռք բերելն է:
– Իսկ քանի՞ օլիմպիական ուղեգիր եք պլանավորում նվաճել:
-Ես միշտ էլ լավատես եմ ու ձգտում եմ առավելագույնին: Կփորձենք վեց քաշային կարգերում էլ օլիմպիական ուղեգիր նվաճել: Իսկ թե ինչ կստացվի, ցույց կտա մրցագորգը:
Հայաստանի ըմբշամարտի ֆեդերացիայի մամլո ծառայություն