Մարտի 5-ին Ստամբուլի Բողազիչիի համալսարանի «Դեմիր Դեմիրգիլ» դահլիճում արվեստի ցուցադրման համույթը ցուցադրել է պոլսահայ գրող Զապել Եսայանի կյանքը և գործունեությունը ներկայացնող բեմադրություն։ Այս մասին գրում է Թուրքիայում լույս տեսնող հայկական «Ակօս» շաբաթաթերթը։
Եսայանի՝ «Զինագործների այգիները» գրքի հիման վրա կատարված բեմադրությունը ցուցադրվել է «Աշխարհի կանանց օր» շաբաթվա շրջանակներում: Ավելի վաղ նույն համալսարանում ցուցադրվել էր Եսայանի մասին պատմող վավերագրական ֆիլմ՝ «Գտնել Զապել Եսայանին» խորագրով։
Զապել Եսայանը ծնվել է 1878 թվականին Պոլսի Սկյութար թաղամասում: 1915 թվականի Հայոց ցեղասպանության ժամանակ հրաշքով ողջ մնալով՝ տեղափոխվել է Բուլղարիա, այնուհետև՝ Բաքու: Իր մասնակցությունն է ունեցել հայ որբերի խնամքի գործում: 1921 թվականին տեղափոխվել է Փարիզ, իսկ 1933-ին՝ Երևան: Երևանի պետական համալսարանում գրականության դասեր է տվել: 1937-ին ենթարկվելով ստալինյան բռնաճնշումներին՝ աքսորվել է Սիբիր: Մահվան մասին ստույգ տեղեկություններ չկան, սակայն ենթադրվում է, որ նա մահացել է 1943թ.-ին հենց Սիբիրում:
Նշենք նաև, որ Զապել Եսայանը հեղինակել է 11 էջանոց զեկույց, որտեղ ներկայացված է եղել 1915-ին և դրանից հետո հայ կանանց առևանգումը: Այդ զեկույցը 1919-ի Փարիզի վեհաժողովում ներկայացվել է հայկական պատվիրակության ղեկավար Պողոս Նուբար Փաշային: