Ռուսաստանի գլխավոր դատախազությունն օրեր առաջ պատասխանել է Պերմյակովին ՀՀ արդարադատությանը հանձնելու վերաբերյալ` «Ժառանգություն» խմբակցության պատգամավոր Զարուհի Փոստանջյանի նամակին:
ՌԴ դատախազությունն իր պատասխան նամակում, հղում անելով ՌԴ Սահմանադրության 61-րդ հոդվածին, նշում է, որ Վալերի Պերմյակովը ՌԴ քաղաքացի է և ՀՀ իրավապահներին հանձնվել չի կարող:
«Առաջին լրատվական»-ի հետ զրույցում Ռուսաստանի Փաստաբանների միության նախկին փոխնախագահ, «Բինեցկի և գործընկերներ» իրավաբանական ընկերության ղեկավար, հայտնի իրավաբան Ալեքսեյ Բինեցկին «հիմարություն» որակեց Ռուսաստանի գլխավոր դատախազության պատասխանը:
Բինեցկին, հղում անելով Հայաստանի և Ռուսաստանի միջև կնքված` ռուսական ռազմաբազայի վերաբերյալ պայմանագրին, հայտարարեց՝ այն անձը, ով հանցագործություն է իրականացնում ռազմաբազայի տարածքում, պետք է դատապարտվի և իր պատիժը կրի Ռուսաստանում, իսկ ռազմաբազայից դուրս արված հանցագործությունը քննում է Հայաստանի իրավապահ համակարգը: «Հիմարություն է այդ պատասխանը, որն իր մեջ նաև վնաս է պարունակում»,- ասաց նա:
Մեր հարցին, թե Ռուսաստանի այս դիրքորոշումը պարզապես սկզբունքայնություն կարո՞ղ ենք որակել, Բինեցկին արձագանքեց․«Հիմարներ են պարզապես, այլ մեկնաբանություն չունեմ: Այո, սկզբունքայնության հարց է, այսօր Ռուսաստանի չինովնիկներն այդպես են պատկերացնում հայրենասիրությունը՝ ոչ մեկին երբեք ոչինչ չզիջել: Նույնիսկ եթե դա օրենքի խախտմամբ է արվում»:
Լրատվամիջոցներում այս օրերին տեղեկություն տարածվեց, որ Պերմյակովին մեղսունակ են ճանաչել, մինչդեռ ռուսաստանյան «Ինտերֆաքս»-ն այսօր հրապարակեց, որ դատաբժշկական փորձաքննությունը նոր է լինելու:
Ալեքսեյ Բինեցկին մեզ հետ զրույցում դժվարացավ պատասխանել այն հարցին, թե ի՞նչ պատժաչափ կսահմանեն Ավետիսյանների 7 հոգանոց ընտանիքի դաժան սպանության մեջ մեղադրվող Վալերի Պերմյակովի համար:
«Կա օրենք, ինչ-որ բանի համար ստորագրվել են այդ օրենքները: Այդ ի՞նչ հղում են անում ՌԴ սահմանադրությանը: 1999 թվականին գործում էր այն նույն սահմանադրությունը, որը հիմա կա: Այն երկու գարշանքները, որ Գյումրիում դարձյալ մարդ սպանեցին 1999 թվականին, Հայաստանում դատվեցին, հետո, օրենքի համաձայն և հետևելով խնդրանքին, փոխանցվեցին Ռուսաստանին՝ այնտեղ պատիժ կրելու համար: Ես կրկնում եմ՝ այդ սրիկան պետք է դատվի Հայաստանում՝ հայ իրավապահների կողմից՝ և՛ իրավաբանական, և՛ քաղաքական տեսանկյունից»,- ասաց նա:
Փաստաբանի խոսքերով՝ հնարավոր է` այս ամենն արվում է նաև, որպեսզի ցույց տան, թե Հայաստանը երկրորդ կարգի երկիր է, և լարվածություն առաջացնեն հայ ու ռուս ժողովուրդների բարեկամության մեջ: «Դա ձեռնտու է նրանց, ովքեր չեն ուզում, որ հայերի ու ռուսների միջև նորմալ հարաբերություններ լինեն, նույնիսկ եթե հարցն այսպիսի ողբերգության է վերաբերում: Այդ պատճառով ես կարծում եմ, որ ՌԴ դատախազության պատասխանը նախ անգրագետ է, հետո էլ ՝ քաղաքականապես վնասակար»,- եզրափակեց նա:
