«Ես արդեն 4 տարի ա չկամ էդ խաղերի մեջ: Ո’չ գնում եմ, ո’չ գալիս եմ, ո’չ էլ տալիս-առնում եմ որևէ մեկի հետ: Ինձ ոչ մի բան չի հետաքրքրում: Սկի տեղյակ էլ չեմ` ինչ ա կատարվում ԲՀԿ-ում»,- «Առաջին լրատվական»-ի հետ զրույցում ասաց ԱԺ ԲՀԿ-ական նախկին պատգամավոր, գործարար Գոհար Ենոքյանը, ով ժամանակին բավական մտերիմ էր հատկապես Ծառուկյանի մոր՝ Ռոզա Ծառուկյանի հետ:
Տիկին Ենոքյանից հետաքրքրվեցինք՝ շարունակելո՞ւ է մնալ ԲՀԿ-ում և հնարավո՞ր է հետևի իր կուսակիցների օրինակին ու դուրս գա կուսակցությունից: «Ինչ պարտադիր ա` դիմում գրեմ: Որ ո’չ գնում-գալիս եմ, ո’չ տալիս-առնում եմ, ո’չ մասնակցում եմ որևէ կուսակցական միջոցառման, նշանակում ա` դուրս եկած եմ, էլի, էդ թղթի կտորն ա՞ խանգարում: Պարտադիր ա՞ գրավոր գրեմ»,- զարմացավ նա:
Ինչ վերաբերում է իր կուսակիցների՝ կուսակցությունը մասսայաբար լքելուն, Գոհար Ենոքյանն ասաց, որ այդպես էլ պետք է լիներ, քանի որ բոլորը գնում են անձի հետևից, ոչ թե` գաղափարախոսության: «Ընդե կուսակցական իդեոլոգիա ոչ մեկը չունի: Կարևորը` մեր ժողովուրդը չխաբվի էդ սուտ կուսակցություններով, քաղաքականությամբ, այլ միախմբվի, մեկ բռունցք դառնա, որ մեր հողուջուրը չկորցնենք: Թե չէ` ով դուրս կգա կուսակցությունից, ով կմնա, իր գործն է»,- ասաց Ենոքյանը՝ հավելելով. «Վերջում նորից ասում եմ՝ իմ անունը չգրեք էդ առնետների ցուցակում: Ես շատ վաղուց` 2012 թվականից երդվել եմ, որ քաղաքականության, կուսակցականության հետ գործ չեմ ունենալու: Աշխատելու եմ, իմ բիզնեսով եմ զբաղվելու` այնքանով, ինչքանով իմ առողջությունն է ներելու: Ես արդյունաբերություն եմ սիրում, մնացած ոչ մի բան ինձ չի հետաքրքրում»:
