«Օրենքի լրամշակված տարբերակում փոփոխությունները կատարվեցին ոչ այնպես, ինչպես մենք ուզում էինք: Սա մի փոքր ավելի լավն է, քան առաջին տարբերակը, բայց խնդիրները շարունակում են մնալ չլուծված: Սա մեր պատկերացրած օրենքը չէր»,- «Առաջին լրատվական»-ի հետ զրույցում ասաց Փոքր և միջին ձեռնարկությունների հայկական միության նախագահ Ստեփան Ասլանյանը, որը մշտապես համակարգել է ձեռնարկատերերի բողոքի ակցիաներն ու պայքարել օրենքի փոփոխության համար:
«Մարդիկ արդեն զզվել են չհասկացվելուց: Զզվել են, որ չինովնիկներն իրենց կաբինետներում նստած օրենքներ են մշակում՝ առանց տեղյակ լինելու ձեռնարկատիրոջ դժվարություններից: Այս ամենից արդեն սկսել ենք զզվել»,-հավելեց Ասլանյանը:
Հիշեցնենք, որ երեկ Ազգային ժողովն արտահերթ նիստում 92 կողմ, 6 դեմ և 13 ձեռնպահ ձայների հարաբերակցությամբ առաջին ընթերցմամբ ընդունեց «Շրջանառության հարկի մասին» ՀՀ օրենքում փոփոխություններ կատարելու օրենքի նախագծի լրամշակված տարբերակը: Այս տարբերակով ՓՄՁ ներկայացուցիչները, փաստաթղթավորման բացակայության դեպքում, նախկին 3,5 տոկոսի փոխարեն ստիպված են լինելու վճարել 5% շահութահարկ։ Իսկ այն ՓՄՁ-ները, որոնք կհամաձայնեն կատարել պարտադիր փաստաթղթավորում, վճարեն 1 % շահութահարկ: «Այսպիսով հարկային բեռը հաշվարկվելու է 5 տոկոսով, եթե փաստաթուղթ ունենաս, ապա նոր կդառնա 1 տոկոս: Իսկ մեր առաջարկը հետևյալն էր, որ եթե կա փաստաթուղթ, ապա թող վճարեն 1.5 տոկոս, եթե չկա փաստաթուղթ, ապա թող վճարեն 3.5 տոկոս: Բայց, չգիտես ինչու, վերջին րոպեին ամեն ինչ փոխվեց, և՝ առանց մեզ հետ քննարկելու»,- ասաց Ասլանյանը:
Նրա խոսքով՝ բացի սրանից՝ երեկ առաջին ընթերցմամբ ընդունված օրենքով անհրաժեշտ է, որ բոլոր ձեռներեցները պարտադիր հաշվապահ ունենան, որը նոր դժվարություններ ու հավելյալ ծախսեր է ենթադրում մարդկանց համար: «Մենք երբևէ չենք տեսել, որ խոշոր բիզնեսի համար այսքան օրենքներ, փոփոխությունենր լինեն, քան փոքր ու միջին բիզնեսի համար: Իսկ պատճառն այն է, որ խոշոր բիզնեսը հենց իրենց է պատկանում, և իրենք մեկ անգամ և իրենց ձեռնտու օրենքն են ընդունում, ու վերջ, իսկ ամբողջ բեռը մնում է ՓՄՁ-ների վրա»,- եզրակացրեց Ասլանյանը:
Նշենք, որ երեկ ԱԺ արտահերթ նիստում, երբ քննրակվում էր օրենքի այս նախագիծը ՀԱԿ-ը, «Ժառանգությունը» դեմ, ՕԵԿ-ը՝ ձեռնպահ, իսկ ՀՀԿ-ն ու ԲՀԿ-ն կողմ քվեարկեցին: Ընդ որում՝ քվեարկությունից առաջ ԲՀԿ խմբակցության քարտուղար Նաիրա Զոհրաբյանն ասաց, որ իրենք երեկ հանդիպումներ են ունեցել ՓՄՁ որոշ ներկայացուցիչների հետ, և նրանք են խնդրել պատգամավորներին, որ կողմ քվեարկեն նախագծին, որովհետև փոփոխված տարբերակն իրենց սրտով է: «Բարգավաճ Հայաստանը» ես չգիտեմ՝ ում հետ ինչ է քննարկել: Մենք տեղյակ չենք այդ քննարկումներից: ԲՀԿ-ն հավանաբար հարցը քննարկել է այն ձեռնարկատերերի հետ, որոնց ծեծեցին հրապարակում: Մի երկու հոգի կային «Բարգավաճից»: Բայց ես չգիտեմ՝ դրանք ինչ կարգի ձեռնարկատեր են, ինչքանով է ձեռք տալիս, բայց ամեն դեպքում վերջին պահին էլ, նույն ԲՀԿ-ի կարծիքով, պետք է լիներ 1.5 և 3.5 տոկոս, ոչ թե 5 տոկոս: Ակցիաներին մասնակից ԲՀԿ-ականները ևս դա էին պահանջում: Բայց ես չհասկացա, թե ինչու իրենք այդպես, շատ արագ փոխեցին իրենց մոտեցումը»,- զարմացած ասաց Ասլանյանը:
Բացի նրանից, որ օրենքի այս տարբերակն այն չէ, ինչ իրենք պատկերացնում էին և ինչի համար պայքարում էին, ոլորտի ներկայացուցչի խոսքով՝ դեռ խնդիրներ կան՝ կապված ոսկու շուկայի հետ, որը չառանձնացվեց, ինչպես նախապես պայմանավորվածություն էր ձեռք բերվել: Ըստ այդ պայմանավորվածության՝ ոսկու շուկայի, ոսկու բիզնեսով զբաղվողների համար նոր օրենք պետք է ընդունվեր, սակայն այդպես չեղավ, և հիմա հասկանալի չէ, թե այդ մարդիկ ինչպես են աշխատելու:
«Ինչքան էլ մեր հարգարժան Կարեն Ճշմարիտյանը, որի ազգանունը ճշմարիտ բառից է ծագում, ամբիոնից հայտարարի, որ այս օրենքը հարկային բեռի բարձրացում չէր, բայց սա մաքուր հարկային բեռի բարձրացում է. այս օրենքը այլ կերպ որակել հնարավոր չէ: Եթե քաղաքացին առ այսօր աշխատել է 3.5 տոկոս հարկով, իսկ հիմա այդ հարկը դարձվում է 5 տոկոս, դա հարկային բեռի բարձրացում չէ, ի՞նչ է: Եվ այն տպավորությունը, թե նրանք այս քայլով ստվեր են վերացնում, հիմարություն է: Իրենք դրանով պարտակում են ստվերը, որը մաքսային կետերում է և հենց իրենց ձեռքում է»,-ասաց Ասլանյանը:
Նա նաև նշեց, որ իրենք այլևս չեն փորձելու միջամտել ԱԺ երկրորդ և երրոդր ընթերցմամբ օրենքի ընդունման ժամանակ: «Անիմաստ է դիմելը, քանի որ այլևս ոչ մի հույս չկա, որ բան կփոխվի: և հետո էլ որ քաղաքական ուժին դիմենք, եթե երեկվա քվերակությունը ցույց տվեց, թե ով ինչպես է մտածում: Այդ ձեռնպահ քվեարկածներին էլ կողմ համարեք ու կտեսնեք, թե ով ով է: Այլ բան հնարավոր չէ ասել»: