Այսօր կառավարության դիմաց էին հավաքվել Արմավիրի մարզի Լենուղի համայնքի մի խումբ բնակիչներ, ովքեր ապրում են ծայրահեղ վատ պայմաններում գտնվող վթարային շենքում և հերթական անգամ կառավարությունից պահանջում էին լուծում տալ իրենց խնդրին:
Բնակիչները այդ վթարային պայմաներում ապրում են 1988 թվականի երկրաշարժից ի վեր, 25 տարի, բայց արդեն հնարավոր չէ:
Բնակիչներից մեկն անգամ պատմեց, որ երեկ գիշեր բնակարանի պատը փուլ է եկել և թափվել անչափահաս երեխաներից մեկի գլխին: «Ի՞նչ են ուզում, ուզում են, որ մեռնե՞նք բոլորով: Էդպես էլ կլինի, մի օր բոլորս էլ կմնանք այդ փլատակների տակ»,- բորբոքված ասաց մի կին:
Բնակիչների խոսքով՝ այդ վթարային շենքում 25 ընտանիք է ապրում, սակայն տարրական կենցաղային պայմաններ չկան, սանհանգույց չկա, տանիքները պոկված են: Անգամ լողանալու հնարավորություն չունեն:
Բնակիչները հանդիպում էին խնդրում կառավարության ներկայացուցիչների հետ, սակայն որևէ մեկն այդպես էլ չընդունեց և չլսեց նրանց խնդիրը: Կառավարության արհամարհական վերաբերմունքից վիրավորված՝ Լենուղի գյուղի բնակիչները հավաքեցին իրենց պաստառները, երեխաներին ու հեռացան: «Եթե այստեղ մեզ արհամարհում են, մենք էլ անելիք չունենք այստեղ: Սա՞ է իրենց ապահով Հայաստանը»: