ԱՄՆ-ի «Մակդոնալդսները» երկու տարի անց ամբողջովին կհրաժարվեն հակաբիոտիկներով աճեցված թռչնի մսից: Այս մասին է հաղորդում Reuters գործակալությունը:
Նման որոշում կայացվել է այն բանի հետ կապված, որ հավերի վրա նման միջոցների չափազանց կիրառումը կարող է բացասաբար անդրադառնալ մարդկային ինֆեկցիաների դեմ պայքարում հակաբիոտիկների արդյունավետության վրա: Գիտնականների կարծիքով՝ մսի արտադրության մեջ հակաբիոտիկների հաճախակի կիրառումը կարող է հանգեցնել «գերբակտերիաների» ստեղծմանը:
ԱՄՆ-ի Հիվանդությունների վերահսկման և պրոֆիլակտիկայի կենտրոնի տվյալների համաձայն՝ «գերբակտերիաների» պատճառով ԱՄՆ-ում տարեկան 23 հազար մարդ է մահանում:
Հակաբիոտիկները մսի արտադրության մեջ կիրառվում են 1940-ականներից: Բժշկական դեղորայքներն անհրաժեշտ են, որպեսզի թռչուններն արագ քաշ հավաքեն և առողջ աճեն: