ԲՀԿ խմբակցության պատգամավորները երեկ մեր զրույցներում նշում էին, որ չեն ցանկանում մեկնաբանել և գնահատական տալ ՀԱԿ առաջնորդ Լևոն Տեր-Պետրոսյանի՝ Մարտի 1-ի հանրահավաքի ելույթին: Նրանցից ոմանք, սակայն, չխուսափեցին խոսել հանրահավաքի ու Տեր-Պետրոսյանի ելույթի մասին, իհարկե՝ ոչ դրական իմաստով:
Հիշեցնենք, որ Լևոն Տեր-Պետրոսյանը իր խոսքում հայտարարել էր, որ ՀԱԿ-ը ընդդիմության դաշտում մենակ է մնացել, և կապված Հայոց ցեղասպանության 100-ամյա տարելիցի հետ՝ երկամսյա հանրահավաքային դադար են վերցնում: Այս հայտարարությունների վերաբերյալ երեկ Armtimes.com-ը մի քանի հարց է ուղղել ԲՀԿ խմբակցության պատգամավոր Վահան Բաբայանին.
– Պարոն Բաբայան, ինչպե՞ս կգնահատեք Տեր-Պետրոսյանի ելույթը:
– Ցանկություն չունեմ ընդհանրապես մեկնաբանելու:
– Երբվանի՞ց չցանկացաք այլևս մեկնաբանել Տեր-Պետրոսյանին:
– Իր հայտնի սրտի պարտքից հետո:
– Համաձայն չե՞ք Տեր-Պետրոսյանի այն հայտարարության հետ, որ ընդդիմադիր դաշտում ՀԱԿ-ը մենակ է մնացել:
– Իհարկե համաձայն չեմ: ԲՀԿ-ին էլ եմ ես տեսնում ընդդիմադիր դաշտում:
– ՀԱԿ նախագահին այլևս չե՞ք համարում ԲՀԿ-ին գործընկեր:
– Իսկ մենք իրեն համարո՞ւմ ենք մեզ գործընկեր: Ես անձամբ իրեն գործընկեր չեմ համարում, դա իմ կարծիքն է:
– Ի՞նչը փոխվեց, որ սկսեցիք նրան այլևս գործընկեր չհամարել:
– Առաջին նախագահը կարող է իր կարծիքները ունենալ, բայց մենք էլ կարող ենք մերը ունենալ: Ո՞վ է ասել, որ մոտեցումները պետք է միակերպ լինեն: Իր ելույթները արդեն ինձ չեն հետաքրքրում, իսկ եթե այլ ուժերի է մեղադրել, դիմեք այլ ուժերի ներկայացուցիչներին:
– ՀԱԿ-ի հետ համագործակցություն այլևս չի՞ լինելու, դուք դա բացառո՞ւմ եք:
– Այո՛, ես, համենայնդեպս, բացառում եմ:
– Ինչո՞ւ:
– Դա իմ կարծիքն է:
– Այսինքն՝ ԲՀԿ-ն շարունակելո՞ւ է մնալ ընդդիմադիր դաշտում:
– Կարծում եմ՝ այո, մնալու է: Բայց թե ի՞նչ ձևակերպումներով, մոտեցումներով ու նպատակներով՝ դա կերևա մեր համագումարի ժամանակ: Չշտապենք: Իսկ Տեր-Պետրոսյանի մասով այլևս ես չեմ ուզում մեկնաբանություններ անել, դա ինձ չի հետաքրքրում:
ԲՀԿ խմբակցության մեկ այլ պատգամավոր՝ Արմեն Ավետիսյանը, ևս պատասխանեց մեր հարցերին.
– Պարոն Ավետիսյան, ինչպե՞ս կգնահատեք Տեր-Պետրոսյանի ելույթը:
– Չեմ լսել:
– Ինչո՞ւ:
– Անկեղծ ասած՝ չի հետաքրքրում:
– Իսկ հոկտեմբերյան հանրահավաքների ժամանակ, երբ Տեր-Պետրոսյանը ելույթ էր ունենում, հետաքրքրո՞ւմ էր, թե ոչ:
– Դա իր հանրահավաքներն ու ելույթները չէին, դա մեր հանրահավաքներն ու ելույթներն էին:
– Տեր-Պետրոսյանը հայտարարել է, որ ընդդիմադիր դաշտում ՀԱԿ-ը մենակ է մնացել: Համաձայն չե՞ք այս մտքի հետ:
– Մեր համագումարին հաշված օրեր են մնացել, կգա օրը, կասենք, կլսեք, կիմանաք: Կիմանաք՝ իրենք մենա՞կ են ընդդիմադիր, թե՞ ուրիշ ուժեր էլ կան:
– ՀԱԿ-ին ձեզ գործընկեր այլևս չե՞ք համարում:
– Ճիշտն ասած՝ ոչ, չեմ համարում..
Ամբողջությամբ՝ սկզբնաղբյուր կայքում
