Ընդգծված հակահայ գործունեություն ծավալող թուրքական «Թալեաթ փաշա» կոմիտեի նախագահ, հայտնի հայատյաց Դողու Փերինչեքի «Հայրենիք» կուսակցության փոխնախագահ, թոշակի անցած գեներալ Իսմաիլ Հաքքը Փեքինը թուրքական «Հաբերթյուրք» կայքի հետ զրույցում հայտնել է, որ Թուրքիայի զինված ուժերի գլխավոր շտաբը ժամանակին հակահայ նյութեր է պատրաստել և հրապարակել համացանցում։
Գլխավոր շտաբի հետախուզական վարչության նախկին պետը, որը 2011 թվականին ձերբակալվել էր Ստամբուլի 13-րդ ծանր հանցավորությունների դատարանի հրահանգով «հասարակական կարծիքի փոփոխմանն ուղղված ինտերնետային կայքերի ստեղծման» գործի շրջանակներում, նշել է, որ վերոնշյալ նյութերը հրապարակվել են ինչպես քաղաքական, այնպես էլ հայերին թիրախավորելու նպատակով։
«Հակահայ նյութերը համացանցում հրապարակվել են Թուրքիայի զինված ուժերի գլխավոր շտաբի տեղեկատվական աջակցության վարչության նախաձեռնությամբ»,- ասել է Փեքինը։
Նշենք, որ Փեքինը մեղադրվել է «Թուրքիայի Հանրապետության կառավարության ոչնչացման համար ուժ կիրառելու» և «ահաբեկչական կազմակերպություն ղեկավարելու» համար։ Ձերբակալության օրերին թուրքական մամուլում լուրեր էին պտտվում, թե նա իր պաշտոնավարման տարիներին 430 ինտերնետային կայքեր ծառայեցրել է հետախուզական նպատակներով։ 2013 թվականին դատարանը թուրք գեներալին մեղավոր էր ճանաչել «Էրգենեքոնի» գործով և 7 տարվա ազատազրկման դատապարտել, սակայն ամիսներ անց նրան ներում էր շնորհվել։