Minecraft-ի հիմնադիր Մարկուս Պերսոնը պատմել է, թե ինչու է 2014 թ. համաձայնել Mojang ընկերությունն ու Minecraft ապրանքանիշը 2,5 մլրդ դոլարով վաճառել Microsoft-ին, հայտնում է Lenta.ru-ն:
Forbes ամսագրին տված հարցազրույցում նա ասել է, որ որոշիչ գործոններից մեկը եղել է խաղային ընկերությունների վայրկենական արձագանքը կեսկատակ հաղորդագրությանը, որը գեյմ-դիզայները հունիսի 16-ին հրապարակել է Twitter միկրոբլոգում: «Որևէ մեկն ուզո՞ւմ է ձեռք բերել իմ բաժինը Mojang-ում, որպեսզի ես վերջապես կարողանամ հանգիստ շունչ քաշել»,- ասվում էր հաղորդագրության մեջ:
Mojang-ի գործադիր տնօրեն Կառլ Մանեի խոսքով՝ Microsoft-ից զանգը ստացվել է իր` հաղորդագրությունը տեսնելուց 30 վայրկյան հետո:
Նախկինում Պերսոնն ասել է, որ Mojang-ի վաճառքը բացառված է, և դատապարտում էր այն ստուդիաներին, որոնք հրաժարվում են անկախությունից: Բայց այդ անգամ նա առաջարկի մեջ իր համար բեռ դարձած ապրանքանիշից ազատվելու հնարավորություն էր տեսել:
Պերսոնը կարծում է, որ կարող էր Mojang-ն ավելի թանկ վաճառել, սակայն դա ժամանակ կպահանջեր, իսկ ինքն ուզում էր արագ հրաժեշտ տալ կուռքի դերին, որն ինքը դարձել էր Minecraft-ի երկրպագուների համար:
Օրիգինալ Minecraft-ը գոյատևման մասին խաղ է և միաժամանակ ստեղծագործական գործիքների հավաքածու: