ԱՄՆ-ի 8 խոշորագույն տեխնոլոգիական ընկերությունները օֆշորում 69 մլրդ դոլարի ներդրում են արել 2014-ին: Այս մասին հայտնում է Bloomberg գործակալությունը՝ հղում անելով իր ուսումնասիրությանը:
Microsoft-ը, Apple-ը, Google-ն ու ևս 5 բարձր տեխնոլոգիական ֆիրմաներ ԱՄՆ-ի սահմաններից դուրս են տարել ընդհանուր 2,1 տրիլիոն դոլարի ավելի քան 10%-ը, որը նրանք պահում են արտասահմանում, նշում է գործակալությունը: Նրա տեղեկությամբ՝ ԱՄՆ-ի սահմաններից դուրս ակտիվներ պահող ամերիկյան ընկերությունների ընդհանուր թիվն անցած տարի աճել է 8%-ով:
Ընկերությունները, որոնք իրենց կապիտալները տանում են ավելի պակաս հարկերով երկրներ, գրավել են ԱՄՆ նախագահ Բարաք Օբամայի և կոնգրեսականների ուշադրությունը: ԱՄՆ իշխանության ներկայացուցիչները նոր պետական ծրագրերի ֆինանսավորումն ավելացնելու, ինչպես նաև հարկային օրենսգիրքը փոխելու հնարավորություն են տեսնում, նշում է գործակալությունը:
Միաժամանակ, նշաններ կան, որ տեխնոլոգիական ընկերություններն իրենց կապիտալներն ԱՄՆ կվերադարձնեն նախքան իշխանության` այդպիսի հրահանգը: Հաղորդվում է, որ 58 ամերիկյան ընկերություններ իրենց ակտիվները վերադարձնում են ԱՄՆ, սակայն հատկապես որոնք՝ չի նշվում: