Ավետիսյանների 7 հոգանոց ընտանիքի սպանությունից հետո Գյումրիում տեղի ունեցած բախումների առթիվ հարուցված քրգործով մոտ 32-38 հոգի ստացել է կասկածյալի կարգավիճակ, իսկ մոտ 10 հոգու մեղադրանք է ներկայացվել խուլիգանության, հասարակական կարգ խախտելու հոդվածներով:
Այս մասին Facebook-ի իր էջում կատարված գրառմամբ հայտնում է Գյումրիի ավագանու անդամ, «Ասպարեզ» ակումբի նախագահ Լևոն Բարսեղյանը:
«Ես զրուցել եմ նրանցից ևս երկու հետ, բացի սառնաղբյուրցի Մնացական Ալեքսանյանից ու գյումրեցի Անուշավան Հարությունյանից։ Պատմեցին, որ տեսանյութեր են ցույց տվել իրենց, որոնցում իրենք են եղել քարուփետով պաշտպանվելիս, մեղադրանք են ներկայացրել ու խափանման միջոց են ընտրել ստորագրությամբ չհեռանալը։ Հրապարակային խոսք ասել չեն ուզում, հույս ունեն, որ գործը կկարճեն կամ համաներմամբ կավարտվի…»,- գրում է Բարսեղյանը և հավելում.
«Սերժիկի ռեժիմը, իր գործին, գլուխը կախ, պատանդ առնելու հին մեթոդով շարունակում է ահաբեկել մարդկանց, որ հանկարծ ոտքի չելնեն նորից, ձու չշպրտեն իրենց պապայի հյուպատոսարանի վրա, թե չէ պապան անկյուն կկանգնեցնի սերժիկներին…»:
Հիշեցնենք, որ հունվարի 15-ին Գյումրիում ռուսական հյուպատոսության շենքի մոտակայքում տեղի ունեցավ բախում ցուցարարների և ոստիկանների միջև, երբ վերջիններս պատ էին կազմել և ցույցի մասնակիցների թույլ չէին տալիս մոտենալ հյուպատոսության շենքին: Բողոքի ցույցի մասնակիցները ընդամենը ցանկանում էին ՀՀ գլխավոր Գևորգ Կոստանյանի հետ հանդիպել և նրանից պահանջել, որպեսզի դիմի ՌԴ գլխավոր դատախազ Յուրի Չայկային՝ Ավետիսյանների 7 հոգանոց ընտանիքի սպանության մեջ կասկածվող Վալերի Պերմյակովին հայ իրավապահներին փոխանցելու հարցով: