Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց քրեական հեղինակություն Թևոսիկի եղբոր՝ Արթուր Սաֆարյանի սպանության գործից անջատված մասով դատաքննությունը:
Նախ` մեղադրող դատախազը հրապարակեց մեղադրական եզրակացությունը, որում մանրամասն նկարագրված է, թե ինչպես են Իսրայել Սարգսյանն ու Մովսես Ներսիսյանը կազմակերպել Արթուր Սաֆարյանի սպանությունը, որից հետո Իսրայել Սարգսյանը սպանել է նաև Մովսես Ներսիսյանին, որպեսզի չբացահայտվի Արթուր Սաֆարյանի սպանությանն իր մասնակցության փաստը:
Մեղադրական եզրակացության հրապարակումից հետո Իսրայել Սարգսյանը` Իսոն, հայտարարեց, որ իրեն մեղավոր չի ճանաչում առաջադրված մեղադրանքում, եւ այն, ինչ կարդաց դատախազը, «հորինված պատմություն է ու հիմնված է ենթադրությունների վրա»:
Նշենք, որ, ըստ մեղադրական եզրակացության, Իսրայել Սարգսյանին մեղադրանք է առաջադրվել այն բանի համար, որ նա կազմակերպել է Մովսես Ներսիսյանի կողմից Արթուր Սաֆարյանի սպանությունը, օժանդակել հանցագործության կատարմանը, ապա այդ հանցանքը թաքցնելու նպատակով ապօրինաբար, դիտավորությամբ զրկել է կյանքից Մովսես Ներսիսյանին, բացի այդ` ապօրինի ձեռք է բերել և կրել հրազեն հանդիսացող «ՏԿ» մոդելի ատրճանակ և ռազմամթերք հանդիսացող` 3 հատ 5.6 մմ տրամաչափի փամփուշտներ, ինչպես նաև ապօրինի ձեռք է բերել ու պահել ռազմամթերք հանդիսացող` նպատակային օգտագործման համար պիտանի, գործարանային արտադրության «ԷԴՊ» տեսակի էլեկտրական` թվով 4 հատ ճայթիչներ և նետողական պայթուցիկ նյութերի շարքին դասվող` գործարանային արտադրության դեղնաշագանակագույն և շագանակագույն գլանաձև արկային վառոդի` թվով 5 հատ հատիկներ:
Նշենք նաև, որ Իսրայել Սարգսյանը նախկինում դատապարտված է եղել եւ մինչեւ այս դեպքն աշխատել է Գոռ Վարդանյանի դուքենդոյի ֆեդերացիայում` որպես փոխտնօրեն:
Ամեն դեպքում` այսօր հարցաքննվեց գործով 3 վրա, որոնք բոլորն էլ դատարանում իրենց զարմանքը հայտնեցին, թե ինչու են դատակոչվել որպես վրա, քանի որ իրենք ոչ մի բան չեն տեսել, չեն լսել եւ ոչ մեկին չեն ճանաչում:
Առաջինը հարցաքննվեց Արթուր Սաֆարյանի հարևան Արմեն Չախնախչյանը, ով լսել էր կրակոցները ու օգնության կանչերը, հետո իջել բակ եւ Սաֆարյանին նրա որդու հետ պատահական ավտոմեքենայով տեղափոխել հիվանդանոց: «Ուրիշ ոչ մի բան չգիտեմ ու խնդրում են սրանից հետո ինձ չանհանգստացնեք»,- հայտարարեց վկան ու հեռացավ դատարանից:
Երկրորդ վկան հիվանդանոցի հերթապահ բուժքույրն էր` Ռուզաննա Սարգսյանը, ով նույնպես հայտարարեց, որ ոչ մի բանից տեղյակ չէ: Նա ասաց, որ ինքը դեպքի օրը մատյանում պարզապես գրանցել է կատարվածը, եւ հիվանդանոց բերված անձին բարձրացրել են վիրահատարան, ինքն անգամ վնասվածքը չի տեսել:
Իրեն դատարան կանչելու փաստից էլ ավելի վրդովվեց երրորդ վկան՝ հարևանուհի, որին դեպքի գիշերը հարցաքննել էին: Նա անգամ հրաժարվեց նախաքննական մարմնին տված իր ցուցմունքից, սակայն, երբ մատնացույց արեցին ցուցմունքի տեքստը, նա ընդունեց, որ ինքն է գրել եւ իր ստորագրությունն է: Այս վկան ևս հայտարարեց, որ իրեն այլևս չանհանգստացնեն, ու բորբոքված հեռացավ նիստերի դահլիճից:
Քանի որ դատակոչված մյուս վկաները դատարան չէին ներկայացել, դատական նիստը հետաձգվեց: Հաջորդ դատական նիստը նշանակվեց մարտի 31-ին:
