Վերնիսաժի գործով դատաքննությունը, կարծես թե, մոտենում է ավարտին: Այսօր հարցաքննվեց գործով վերջին վկան՝ Վահան Հակոբյանը, որը վերնիսաժում շների վզկապներ է վաճառում: Ըստ նրա ցուցմունքի՝ դեպքի օրը իր ճնշումը բարձր է եղել և որոշել է գնալ հարակից խանութ՝ օղի գնելու, քանի որ իր ճնշումը միայն օղի ընդունելուց հետո է իջնում: Հենց այդ ճանապարհին էլ ականատես է եղել, որ 3 հոգի քաշքշում և հայհոյում են միմյանց: Այնուհետև տեսել է, որ փոքրամարմին տղան (Գոռ Առաքելյանը) գնացել-նստել է ղեկին ու փակել դուռը, իսկ երկու հաղթանդամ տղաները՝ Վալերի Հովհաննիսյանն ու Նորայրը, փորձել են նրան դուրս բերել մեքենայից: Ըստ վկայի՝ մի անգամ նրանք Գոռին դուրս են բերել, սկսել ծեծել, որից հետո Գոռը կրկին նստել է մեքենայի ղեկին, ապա հաղթանդամ տղաները փորձել են այս անգամ մեքենայի հետևի դռան «մի փոքր իջեցված պատուհանից դուրս հանել Գոռին, սակայն հաջողության չհասնելով՝ հայտարարել են, թե «գնանք, զենքը բերենք, սատկացնենք սրան»: Այնուհետև վկան պատմեց, թե տեսել է՝ ինչպես է Գոռը կրակում, բայց «հաղթանդամ տղաներից» մեկի ոտքերի տակ մեքենայի մեջ: Վկան նաև ավելացրեց, որ «եթե Գոռն ուզենար սպաներ դրանք, ապա ոտքերին չէր խփի»:
Էական նշանակություն ունեցող հարցերին վկան պատասխանում էր, թե այդ պահին աչքերի առաջ մթագնել է, և ինքը չի ֆիքսել այդ պահը, չի տեսել, թե ով է կրակել կամ քանի անգամ: Այն դեպքում, որ կրակոցները չտեսնելու դեպքում գոնե հնարավոր էր լսել:
Պաշտպաներից մեկը և դատավորը վկայից հետաքրքրվեցին, թե մինչև դատարան գալը հնարավո՞ր է՝ ինչ-որ մեկին հանդիպել է, ինչ-որ մեկն իրեն հորդորել է հենց այս ցուցմունքը տալ, սակայն վկան, շփոթված, բայց շատ արագ պատասխանեց, որ «ինքը ոչ ոքի հետ չի շփվում, ոչ ոքի չի ճանաչում ու ոչ ոքի հետ չի խոսել»:
Վկայի հարցաքննությունից հետո Վալերի Հովհաննիսյանի պաշտպանը միջնորդեց, որ վկայի ցուցմունքները անարժանահավատ համարվեն, քանի որ «վկան մտացածին է, հորինված»: Դատարանը, սակայն, մերժեց միջնորդությունը՝ փաստաբանին բացատրելով մտացածին բառի նշանակությունը:
Շների վզկապներ վաճառող վկայի ցուցմուքնները շատ արժանահավատ համարեց միայն Գոռ Առաքելյանի պաշտպան Երեմ Սարգսյանը՝ «Առաջին լրատվական»-ի հետ զրույցում նշելով, որ վկան դատարանին հայտնեց այնպիսի փաստեր, որոնց մինչ այդ ոչ ոք, նույնիսկ նախաքննական մարմինը ուշադրություն չէր դարձրել:
Առավել մանրամասն՝ տեսանյութում:
