ԱԺ ԲՀԿ խմբակցության պատգամավոր Միքայել Մելքումյանը այսօր ԱԺ արտահերթ նիստից հետո լրագրողների հետ զրույցում ասաց, որ վաղը սպասվում է կուսակցության ղեկավարի փոփոխություն, և նոր ղեկավարը կլինի Նաիրա Զոհրաբյանը: Նրա խոսքով՝ Ծառուկյանը շահագրգռված չէ, որ կուսակցությունից մարդիկ դուրս գան, պետք է արժանապատիվ անցնենք այս ճանապարհը, ինչ-որ բաներ կան, որ պետք է ճիշտ գնահատել, օբյեկտիվ նախադրյալները տեսնել ու անցնել առաջ: Նա նշեց, որ գիտի իր անելիքը, այն է՝ դու պետք է հավատարիմ մնաս քո կուսակցությանը, քո թիմին. եթե դու անընդհատ թռչկոտում ես այստեղից այնտեղ՝ դա լավ բան չէ։
Անդրադառնալով Վարդան Օսկանյանի՝ մանդատը վայր դնելու հարցին՝ Մելքումյանը նշեց, որ ինքը Օսկանյանին շատ է հարգում, նա ծանրակշիռ ուղի անցած անձնավորություն է, և իր կարծիքով՝ ճիշտ կլիներ, որ մնար:
Նա նաև ասաց, որ 2017 թվականը սարերի հետևում չէ, և միգուցե Օսկանյանը ուզում է վերաիմաստավորել իր հետագա գործունեության բնույթը և վեկտորը:
Մեր դիտարկմանը՝ Ծառուկյանը լքեց իր թիմին, Միքայել Մելքումյանը արձագանքեց. «Չէ, չէ, չէ, Շառլ դը Գոլը մեկ անգամ հրաժարական է տվել, հետո նորից եկել է»:
Նա չի կարծում, թե հանրությունը կորցրեց վստահությունը ԲՀԿ-ի նկատմամբ. «Ոչ, ոչ, տեսեք՝ պետք է կարողանալ այդ հարցերում էլ ճիշտ և պարզ ճակատով, մարդկային կերպարով ժողովրդի հետ խոսել, ասել, թե ինչ տեղի ուենցավ, ժողովուրդը առանց մեր ասելու էլ գիտի, թե ինչ տեղի ունեցավ»,-հավելեց ԲՀԿ-ական պատգամավորը:
Մեր հարցին՝ Գագիկ Ծառուկյանը վաղը կհայտարարի՞, թե ինչ տեղի ունեցավ, և թե ինչու է մանդատը վայր դնում, Միքայել Մելքումյանը ասաց. «Համագումարում այդ քննարկումը կլինի, ինքն իր խոսքը կասի»:
ԲՀԿ-ն այս փուլում Սերժ Սարգսյանի հրաժարականը չի պահանջի, քանի որ արդիական չէ, իսկ սահմանադրական փոփոխությունների մասին դեռ վաղ է խոսել:
Նա նշեց, որ այլընտրանք չեն մնա, ավելի հավանական է համարում, որ ընդդիմություն հռչակվեն:
ԲՀԿ-ն, նրա կարծիքով, գնում է հերթական ընտրությունների:
Նա նաև նշեց, որ Գագիկ Ծառուկյանը հեռանում է քաղաքականությունից:
Ավելին՝ տեսանյութում: