ՀՀ սպորտի և երիտասարդության հարցերի նախարարության ու Երևանի քաղաքապետարանի համատեղ նախաձեռնությամբ կյանքի կոչվեց մարզական խոշոր նվաճումների հասած հայ անվանի մարզիկների՝ հանրակրթական դպրոցներ այցելելու գաղափարը: Ծրագրի մեկնարկը տրվեց Դավիթաշեն համայնքում գտնվող թիվ 200 հիմնական դպրոցից: Աշակերտների առաջին հյուրը հունահռոմեական ոճի Հայաստանի հավաքականի գլխավոր մարզիչ, օլիմպիական չեմպիոն, աշխարհի ու Եվրոպայի առաջնությունների հաղթող ու բազում մրցանակների տիրակալ Լևոն Ջուլֆալակյանն էր:
Երևանի N 200 հիմնական դպրոցի աշակերտները նախ տեսանյութի միջոցով ծանոթացան Լևոն Ջուլֆալակյանի հարուստ մարզական ու մարզչական պատմությանը, ապա հարց ու պատասխանի միջոցով հետաքրքիր մանրամասներ իմացան նրա առօրյայից, հետագա ծրագրերից, մարզչական ծանրաբեռնված աշխատանքային գրաֆիկից:
Լևոն Ջուլֆալակյանը, շրջայց կատարելով դպրոցում, ծանոթացավ մարզադահլիճի վիճակին, շախմատի կահավորված դասասենյակին ու իր հիացմունքը հայտնեց դպրոցի տնօրինությանը: Իսկ աշակերտներին հորդորեց, անկախ իրենց ընտրած մասնագիտությունից, ձգտել ամենավերին բարձունքին:
«Շատ տպավորված եմ դպրոցի կարգ ու կանոնից, կազմակերպվածությունից: Շատ ողջունելի ծրագիր է: Այս կերպ աշակերտները, որոնք մեր վաղվա ապագան են, կծանոթանան ազգի մեծերի հետ: Եվ ցանկալի է, որ նման հանդիպումներ լինեն նաև մյուս բնագավառների երեվելիների հետ»,-ասաց Սեուլի օլիմպիական չեմպիոնը: Ծրագրի մեկնարկի կապակցությամբ Երևանի թիվ 200 հիմնական դպրոց էր այցելել նաև ՀՀ սպորտի և երիտասարդության հարցերի նախարար Գաբրիել Ղազարյանը:
Ի դեպ՝ ծրագիրը շարունակական է: Մասնավորապես մարտի 11-ին Չարենցի անվան դպրոց կայցելի Լևոն Ջուլֆալակյանի ավագ որդին՝ աշխարհի գործող չեմպիոն Արսեն Ջուլֆալակյանը:
Հայաստանի Սպորտի և երիտասարդության հարցերի նախարարության մամլո ծառայություն
Լուսանկարը՝ Հայաստանի Սպորտի և երիտասարդության հարցերի նախարարության պաշտոնական կայքի