«Համաժողովրդական շարժմանը» հիմնականում ԲՀԿ-ի համար միացած արտախորհրդարանական ուժերին դժվար է այլևս ասպարեզում տեսնել: Նրանք նախկինում հայտարարում էին, որ «Բարգավաճ Հայաստանն» ունի թե՛ մարդկային և թե՛ ֆինանսական հսկայական ռեսուրսներ՝ կարճ ժամանակահատվածում իշխանափոխություն անելու համար, իսկ ԲՀԿ-ի շուրջ տեղի ունեցած հայտնի իրադարձություններից հետո ընդհատակ են անցել: Նույնիսկ համացանցում տարբեր հասարակական կազմակերպությունների ու շարժումների ներկայացուցիչներն այլևս ռազմահայրենասիրական գրառումներով հանդես չեն գալիս, իսկ որոշակի մեկնաբանություններ անելու դեպքում էլ կրկնում են արդեն մաշված այն թեզը, թե Ծառուկյանը ժողովրդին փրկել է արյունահեղությունից:
Եռյակին միացած արտախորհրդարանական ուժերից միայն մի քանիսն են, որ մարտի 1-ին ներկա գտնվեցին Ազատության հրապարակում հրավիրված` մարտի 1-ի հանրահավաքին:
Ժողովրդական կուսակցության նախագահ Տիգրան Կարապետյանը, օրինակ, չի մասնակցել և հայտարարում է, թե Լևոն Տեր-Պետրոսյանն աղավաղել է ընդդիմադիր դաշտը և բոլորին փչացրել: Հարցին՝ մի՞թե առանց ԲՀԿ-ի իրենց նախաձեռնած պայքարն ու իշխանափոխություն անելու հայտարարությունները ևս չեղյալ են համարվում, Կարապետիչը արձագանքեց, թե նման պրովոկացիոն հարցերի ինքը չի պատասխանում:
«Ազգային համաձայնություն» կուսակցության նախագահ Արամ Հարությունյանը երեկ ներկա է եղել ՀԱԿ-ի հրավիրած մարտիմեկյան ամենամյա հանրահավաքին: « Ես միշտ ժողովրդի կողքին եմ` անկախ ամեն ինչից»,- մեզ հետ զրույցում ասաց Հարությունյանը՝ հավելելով, որ հիմա ոչինչ ասել չի ուզում, սակայն առաջիկայում հանդես կգա սենսացիոն հայտարարություններով:
Հանրահավաքին ներկա են եղել նաև «Ազգային անվտանգություն» կուսակցության նախագահ Գառնիկ Իսագուլյանը, կուսակցության շարքային անդամներ: Նա «Առաջին լրատվական»-ի հետ զրույցում վերահաստատեց իր նախկին տեսակետը, որ եռյակում հիմնական դերակատարը «Բարգավաճ Հայաստանն» էր: «Որևէ այլ կուսակցություն առայժմ լուրջ փոփոխությունների հասնելու հնարավորություն չունի»,- ասաց նա՝ հավելելով, որ հիմա պետք է սպասել և տեսնել, թե ինչ է որոշում ԲՀԿ-ն մարտի 5-ին հրավիրած արտահերթ համագումարում: Նրա խոսքերով՝ կան բոլոր նախադրյալները իշխանափոխության համար, չկա նաև առաջնորդների պակաս, սոցիալ-տնտեսական ծանր պայմաններն էլ ուղղակի ստիպում են, սակայն խնդիրը միայն ռեսուրսների պակասն է, որն ուներ «Բարգավաճ Հայաստան» կուսակցությունը: «Առանց ռեսուրսի անհնար է, հրապարակում մի քանի օր ժողովրդին պահելը բավականին ծախսատար է: Սա 88 թիվը չէ, որ ժողովուրդն ամեն ինչ ուներ և գալիս էր ուղղակի շարժմանն աջակցելու համար: Հիմա նույնիսկ գալու համար ժողովուրդը բավական մեծ խնդիրներ ունի: Հիմա Հայաստանն այնպիսի իրավիճակում է, որ ցանկացած ռեսուրսային աջակցություն կարող է պայթյունավտանգ իրավիճակ ստեղծել Հայաստանում: Հիմա այդ փողերը կլինեն արևմտյան, եվրոպական, թե` թուրքական փողեր, կապ չունի: Մենք մեզ դրել ենք այնպիսի մի վիճակի մեջ, որ ցանկացած ֆինանսական աջակցության դեպքում Հայաստանի ներքին վիճակը կարող է ապակայունանալ»,-ասաց Իսագուլյանը՝ հավելելով. «Բարգավաճ Հայաստան»-ի դեպքում այնքանով էր լավ, որ դա ներքին ռեսուրս էր»:
Գառնիկ Իսագուլյանը հուսով է, որ մարտի 5-ին գոնե ԲՀԿ խորհրդի անդամները չեն գայթակղվի: «Եթե կուսակցությունը կարգապահ կուսակցություն է, ապա պետք է ԲՀԿ խորհրդի անդամները հրաժարվեն ստանձնել կուսակցության նախագահի պաշտոնը, և համագումարն ինքը պարտադրի պարոն Ծառուկյանին մնալ ու շարունակել իր գործունեությունը: Ցանկացած այլ պարագայում պետք է համարենք, որ այդ կուսակցության գործունեությունը կդրվի լուրջ հարցականի տակ»,- եզրափակեց նա: